نجاة: سارة جالها عريس يا سناء، باركيلي.
سناء: ألف مبروك. والعريس بيشتغل ايه؟
محاسب في السعودية ونزل إجازة عشان يدورعلي عروسة.
وحتعملوا الخطوبة فين؟
مفيش خطوبة، أهله قالوا الخطوبة دي للناس المنحلين اللي عايزين يتفسحوا ويتنططوا مع بنات الناس وبعدين يرموهم.
اه صح عندك حق والله. دي نادية بنت الحاج سعيد البقال خطيبها سابها بعد تلات سنين خطوبة وفسح. كانوا داخلين خارجين وهو كل كام يوم يزورهم وبعد كل ده، فسخوا وأبوها يا عيني شكله مكسوف قوي من الناس
شفتي، عشان كله ده غلط، المفروض الراجل يشوف البنت تلات مرات قدام أهلها،. يتكلم معاها شوية كدة ويشوف شكلها وبعدين يقرر عايز يتجوزها أو لا.
طيب العريس قرر؟
ايوة، قال حيعمل عقد النكاح
ايه النكاح ده يا حبيبتي، معلش، استحمليني، انا فهمي علي قدي زي ما انتي عارفة
يعني شايفاني انا اللي خريجة جامعة يا ختي؟ غير بس أنا اللي بحب اتثقف واتنور من الناس اللي فاهمة الدين كويس. وبسمع الشيوخ بيقولوا ايه علي كل القنوات. عقد النكاح يعني كتب الكتاب.
اه، كده فهمت! وطيب ولزومه ايه كلكعة الكلام ما تقولوا كتب كتاب وخلاص عشان الناس تفهم.
لا لازم نتكلم زي ما القرآن بيقول.
ليه ما احنا كل كلامنا عامية ومش بنتكلم فصحي، اشمعني هنا؟
علشان نعرف الناس ان احنا ملتزمين بالشرع يا جاهلة.
طيب يا متنورة، حتعملوا كتب الكتاب فين، يوووه، قصدي عقد النكاح؟
فاكرة النادي اللي سماح بنت اختي عملت فيه فرحها عجبنا انا وانتي ازاي؟
شوف انا لسة بقول لها ايه وهي بتقول ايه، مفيش فايدة. الاسلام هو الحل.
بقولك ده متدين، يعني بتاع ربنا، يعني مفيش نوادي ولا أغاني ولا اختلاط. هو قال كل ده حرام وانا كمان سمعت الشيخ في التليفزيون قال كده برضه. وقال كمان ان الموسيقي دي حتتقلب لنار محموم في ودان اللي يسمعها يوم القيامة. الحمد لله الذي هدانا، لا انت لازم تثقفي نفسك شوية يا حبيبتي قبل ما يفوت الآوان وتلاقي نفسك بتتشوي في نار جهنم. الإسلام هو الحل.
الله الله، انتي مالك داخلة في شمال كده ليه؟ من امتي كل التدين ده يعني؟ ما احنا رحنا سوا فرح سماح بنت اختي وانتي قمتي رقصتي معايا.
شش وطي صوتك لاحسن حد يسمعنا والكلام يوصل للعريس. لا خلاص بقي الحمد لله الذي عافانا، انا تبت
طيب!
سارة قالت لأصحابها في الشغل؟
لا طبعا، الحسد مذكور في القرآن والبنات بتغير من بعض. وسارة أصلا حتسيب الشغل وتقعد في البيت زي ما العريس طلب.
ليه بس كدة؟ دي ياما ذاكرت وتعبت علشان تاخد الشهادة وداختعلي ما لاقت الوظيفة دي. فكري تاني. الوظيفة حماية لها وامان في المستقبل.
لا غلط طبعا. الست امانها مع جوزها ودورها تربي ولادها طالما جوزها مقتدر.وبعدين العريس شرط كدة وقال انه ما يقبلش مراته تختلط بالرجال في الشغل والطريق وان وشها يبقي مكشوف لضعاف النفوس والذين في قلوبهم مرض.
يعني ايه؟حتتنقب كان؟
شوف ازاي! مفيش فايدة! مش لسة كنت بقولك إنه متدين وطول عمره بيشتغل في السعودية،
اكيد طبعا حتتنقب. الديوث بس هو اللي مش بيغير علي اهل بيته.
هو قال كده؟ لا أنا سمعت الشيخ في التليفزيون بيقول. انا مش بقولك انت محتاجة تثقفي نفسك وتشوفي برامج دينية؟
طيب، ربنا يسعدها ويخيب ظني!
قولي كلمة عدلة ولا انتي غيرانة عشان بنتك أكبر منها ولسة ما اتخطبطش؟
انا، بعد كل العشرة اللي بنا، تفتكري في كدة؟ الله يسامحك!ولا،أنا بنتي مش عايزة تتجوز إلا لما تخلص الماجستير وتترقي في الشغل.
كل ده كلام علمانيين. هو التليفزيون اللي خرب مخك.
انا برضه اللي التليفزيون خرب مخي؟!طيب
بعد مضي خمس سنوات
سناء: ازيك يا نجاة؟ وازي سارة وازي البنوتة الصغيرة؟
سارة اتطلقت.
يا خبر اسود، زعلتيني. ليه بس كده؟
جوزها بغير جدا وضربها عشان جه من الشغل لقاها بتتكلم مع محصل الكهربا ودي مش اول مرة، دهكان حابسها ومش بيخليها تيجي تشوفنا الامرةكل شهر وكل ما نشتكي، بيقول انه خايف عليه وان ربنا قال “وقرن في بيوتكن” وفكرنا بقصة الست اللي ابوها دخل الجنة بسببها لانها طاعت جوزها بعدم زيارة ابوها وهو مريض وبيموت، فربنا كافأها بانه دخل ابوه الجنة لما مات. والمصيبة الأكبر انه كان عايز يتجوز عليها كمان.
طيب مش الشرع حلل له أربعة؟ وانتي دايما تقولي لازم نلتزم بالشرع.
لا ده لازم يكون له أسباب قوية وهو مش عنده أسباب.
خلاص معلش تتعوض وهي لسة صغيرة وممكن ترجع شغلها تاني.
شغل ايه بقي، مفيش تعيينات كتير في شغلها دلوقت. وكل ما تقدم على وظيفة، يقولوا لهاان السيرة الذاتية فيها فراغ فوق الخمس سنين.
طيب حتعمل ايه هي دلوقت وتصرف ازاي. بيدفع نفقة؟
بيدفع بس النفقة مابتكفيش حاجة
طيب والحل؟
المحكمة هي الحل!
لقراءة المزيد او لحجز جلسة نفسية، يرجي الحجز عبر
المزيد
1