و قعدت مع نفسي قدام البحيرة علشان استرجع سنة كاملة مرت علي.. وهي ثالث سنه لي في كندا، و أول سنه في الأمومة…
حسيت إنها أطول و أصعب سنه في الثلاث سنين اللي عدوا علي.. و لما كتبتها اتأكدت إنها أصعبهم حتى لحد دلوقتي..
كانت سنة مليئة بالأحداث الصعبة، و اللي معظمها عمري ماتوقعته، ولا تخيلته..
و قعدت مع نفسي قدام البحيرة علشان استرجع سنة كاملة مرت علي.. وهي ثالث سنه لي في كندا، و أول سنه في الأمومة…
حسيت إنها أطول و أصعب سنه في الثلاث سنين اللي عدوا علي.. و لما كتبتها اتأكدت إنها أصعبهم حتى لحد دلوقتي..
كانت سنة مليئة بالأحداث الصعبة، و اللي معظمها عمري ماتوقعته، ولا تخيلته..
و بالرغم من بدايتها الهاديه.. إلا أن معظمها كان متعب و مرهق جدا، لكن نهايتها كانت سعيده..
وبدأت استرجع كل اللي حصل و افرز الاحداث و اقسمها لحاجات كتير..
إخفاقات..قرارات..دروس مستفادة.. أحلام محققة
كانت الإخفاقات مش كتير، لكن أكبرها إن جوازي انتهى من روميو.. أنا عارفة أنه من وجهة نظر ناس كتير نجاح، لكن أنا شايفاه فشل..
أيوه فشل جوازي مهما كان الأسباب هو فشل في النهاية، و فكرة إني أربي أبني لوحدي و أخد لقب انا مش بفضله أبدا و هو (سينجل مام) مش بعتبره نجاح، لكن هسميه تحدي.. و تحدي مش سهل خصوصا لمهاجرة ملهاش عيلة في كندا.. تحدي كبير جدا..
و برغم ان الجوازة دي كانت لازم تنتهي إلا إن جوايا دايما فكرة و ليه ما حصلش؟!.. و ليه مكانش؟! و ليه ما تغيرش؟! والف ليه و ليه؟!.. مع الوقت قدرت إني أبطل أسألها..
أما القرارات فكانت كتير جدا.. يعني انا قررت اني ما ارجعش لروميو، و قررت إني أصعد و أكمل كل حاجة بشكل قانوني، و ده كان أنسب طريق..
كمان قرار اني ساعدته علشان يطلع من سجن الهجرة حتى و انا مقررة اني مش مكمله الإقامة له كان قرار إنساني من وجهة نظري، و مكنتش حتى مستنية شكرا تمام زي ما عملت مع حماتي لما ما رضتش انها تنام في الشارع على حد تعبيرها و اتعامل معاها بإنسانية.. حتى لو هي ما طبقتهاش معايا..
قرار إني اسيب البيت اللي كنت بحبه علشان أفكر بشكل عملي اكتر كان صح.. كان لازم اطلع من بيت باجره بألفين دولار و اشوف حاجة تتماشى مع دخلي، و كان لازم ابطل موضوع مشاركة السكن لأنها من التجارب الفاشلة جدا اللي مريت بها..
و لو جيت للدروس المستفادة فهلاقي إني أخدت دروس بعمري كله في المرحلة دي..
اتعلمت من خلال البرامج اللي كنت بحضرها حاجات كتير عن الأمومة
و اتعلمت منين اجيب المعلومة، و الدعم سواء كان نفسي، او معنوي، او اجتماعي، أو مادي
كمان فكرة اني ادور دايما على مؤسسات بتخدم الحاجة اللي ناقصاني او بدور عليها كانت مهمة جدا، و بقيت خبيرة في النقطة دي
و طبعا اتعملت أن يكون نفسي طويل في كل حاجة و اصبر و احاول.. حتى لو اترفضت تمام زي ما حصل معايا في الأسكان لما قدمت أول مرة و اترفضت
قرار استقالتي في وقت صعب كان قرار صعب، لكن كان لابد منه زي تمام لما الواحد يرمي نفسه في المياه علشان يعوم.. لأن طريق الوظيفة ده مش لي ابدا..
اتعلمت كمان اني اصدق احساسي و لما قلبي يقول لي في حاجة غلط اسمع له و ما اتجاهلش ابدا الرسالة دي..زي ما حصل مع السنجل مام النصابة اللي ورطتني، لكن انا كمان مكنتش ضحية و كنت عارفة من الأول ان في حاجة غلط
و أخيرا اتعملت اني ما اخافش و يكون عندي حسن تصرف و ثبات انفعالي عالي جدا، و ده اللي نجدني من الموقف الصعب جدا مع المتحرش..
و هختم بجزئي المفضل و هي الأحلام.. بس المرة دي هكتب الأحلام اللي اتحققت علشان اقدر المسها بإيدي، و اشوفها بعينيه..
و لأني شخص محور حياته هي الأحلام اللي بيأمن بها جدا و بيتمسك بها لأبعد درجة.. فلما بلاقي احلامي بتتحقق بحس اني ملكت الدنيا، و بحس اني اشطر و أنجح واحدة في الدنيا كلها..
و هسيب قلبي يكتب احلامي اللي حققتها علشان يحتفل بها معايا… و هتكون:
الحلم الأول: إني أصبحت أم و بدأت طريق طويل أوله بس السنه دي .. طريق كله امل و فرحة.. طفل صغير بربيه على إيدي تمام زي البذرة اللي في يوم هتصبح شجرة، ولما تكبر ابص عليها وأملي عيني منها علشان اشوف نتيجة تعبي فيها..
الحلم الثاني: إني نقلت لبيت مستقر و سعره مناسب جدا لي عمره ما يزيد عن 30% من دخلي و له حد أقصى 1200 دولار في بيت في العادي كان هيكون سعره الفين دولار.. كمان موقعه مميز و بيبص على أجمل منظر ممكن أكون شوفته في تورنتو، و كأنه حلم فعلا و بقى حقيقة..
الحلم الثالث:اني قدرت أجيب العربية.. أه لسه ما وصلتش رسمي، بس دفعت تمنها و دي أول خطوة ..و في الجزء اللي جاي هحقق معاها حلم جديد و هو السواقة، و اني اتغلب على خوفي منها..
الحلم الرابع: إني بدأت مشروعي الصغير بمكتب استشارات إدارية و اني أقدم خدمات تسويقية لماركات ملابس واكسسوارات في السوق الكندي على اساس ان المجال ده كان خبرتي لما كنت في دبي.. و بصراحة الحلم ده كنت مستنية اني احققه بفارغ الصبر .. الحلم ده انا حققته رغم ان ظروفي مكانتش مناسبة، و طبعا معنديش أي رأس مال، لكن كنت مستعدة له جدا خصوصا بعد ما حطيت الفكرة في دماغي و درستها و حضرت 3 برامج مختلفة اتعلمت من كل برنامج حاجة مختلفة، و اتعرف على ناس كتير جدا بقوا هم دائرة المعارف بتاعتي.. يعني بعد 6 شهور من دراسة الفكرة قدرت يكون عندي خطة مشروع واضحة امشي عليها، و طبعا الخطة دي بس البداية و هتفضل دايما قابلة للتعديل..
و كالعادة سألت نفسي دبي و لا كندا؟ و هفضل اقول بالنسبة لي كندا بلا منازع برغم كل اللي شوفته، لكن برضه وصلت فيها لنقطة مهمة جدا مكنتش بعرف اوصلها ابدا في دبي وهي : الاستقرار و اني اعمل خطط طويلة الأجل زي مثلا تربية ابني و موضوع مشروعي اللي الاثنين ميلادهم في نفس التاريخ مع اختلاف السنة
لكن فضلت مفتقدة جدا صديقة عمري (البنت الجدعة) اللي ملقتش زيها ابدا..
و لأني عارفة ان يوم 28 مايو من كل سنة كنت بكتب فقرة قصيرة تعبر عن السنة كلها.. و فعلا لقيتني كاتباها، و كنت بقول:
“مرت علي 3 سنوات في كندا..يالها من إثارة مليئة بالمغامرات.. لحظات من السعادة و أخرى من التعاسة..الكثير من التضحيات و خيبات الأمل في نفس الوقت..حياة جديدة كأم، و أخيرا رائدة أعمال كلها أمل”
و انتهى جزء من حياتي و مرحلة حساسة جدا.. وهي أول سنة أمومة، علشان أبدأ مرحلة مهمة جدا هترسم طريقي اللي جاي في بلاد المهجر.. وهي كوني رائدة أعمال.. أو زي ما كانوا بيقولوا عليها زمان – سيدة أعمال-
وإلى أن ألقاكم قريبا في الجزء الرابع من أحلام مهاجرة، و سنة رابعة لي في كندا.. في( أول سنة بيزنس)..
مع خالص تحياتي
ريهام طعيمه
المزيد
1