و بدأ شهر أكتوبر من سنة 2020 و بدأ فصل الخريف تتضح معالمه و ألوانه.. و ده لأن الشجر الكتير الأخضر بتتبدل ألوانه لألوان كتير قبل ما تعلن عن تساقط أوراقه..
و بدأ شهر أكتوبر من سنة 2020 و بدأ فصل الخريف تتضح معالمه و ألوانه.. و ده لأن الشجر الكتير الأخضر بتتبدل ألوانه لألوان كتير قبل ما تعلن عن تساقط أوراقه..
و كلمني الأستاذ الحليوة صاحب العيون الزرق و قال لي:
“أنا مريض جدا ادعيلي”
قلبي وجعني عليه و سألته:” طمني عليك إيه اللي حصل؟”
حكالي على تعب ظهر على ضهره كان ألمه جدا و احتمال قريب يعمل عملية..
و فضل بالي مشغول عليه و حسيت انه من الواجب اني أسأل عليه و اشوف كمان لو محتاج حاجة اقدر اعملها علشانه..
كان دايما بيرد بالرفض و إنه مش محتاج حاجة لكن نبرة صوته كانت مختلفة وكان كلها ضعف و وهن..
و فضلت أحاول تاني مع معارفه انهم يتمموا الصفقة اللي مش باين لها انها هتتم ..
و حاولت كمان افسح ابني و انتهز آخر فترة في الجو المعتدل و رحنا لأخر مرة سوق المزارعين علشان اشتري منه حاجات و نشم شوية هواء..
و اشتريت فطيرة قرع العسل و جبت واحدة تانية للأستاذ لأن عيد الشكر قرب و حاولت افكر في طريقة اوديها له.. تمام زي ما عمل معايا قبل كده أول أزمة الكورونا و جاب لي أكل وقت ماكنش عندي أي حاجة في البيت تتاكل..
و طلعت انا و ابني على جنينة كبيرة هو قعد يلعب و يجري و أنا قعدت أتأمل في ألوان الخريف و أوراق الشجر اللي بدأت تقع..
مش عارفة ليه حسيت إن في ورقة هتقع من شجرتي و الورقة دي هتكون الأستاذ الحليوة..
لحد ما اتصل بي الأستاذ و قال لي:
“ادعيلي أنا داخل أعمل عملية بكرة”
قلبي وقع في رجليه و حاولت أعرف منه مكان المستشفى لكنه رفض..
و فضلت مشغولة عليه جدا خصوصا أن نبرة صوته كانت كلها حزن و خوف..
و بعت له رسالة علشان اطمن على صحته بعدها وفعلا رد علي وقال لي:
“العملية عدت لكن طبعا أنا تعبان”
حاولت أفكر في طريقة اشوفه واطمن عليه و هنا اقترحت على صديقة لي إننا نروح علشان نطمن عليه ..
و فعلا رحت أنا و صديقتي بعد ما أخدت فطيرة قرع العسل و كارت كتبت له فيه كلمات كلها شكر و دعم علشان أرفع من روحه المعنوية
و لما وصلت و خبطت على بابه سمعت صوت واحدة .. لكن المفاجأة ان هو اللي فتح مش هي..
فتح الباب و قال لي:” انتِ بتتجسسي علي؟ ازاي تيجي هنا و متدنيش خبر؟ ”
طبعا هو اتفاجأ اني رحت اطمن عليه و الفكرة اني كنت رايحة اشوفه مع صديقتي نطمن عليه و نمشي على طول خصوصا بعد ما عرفتش اشوفه في المستشفى..
لكن هو اتكسف من نفسه لانه كان بيلعب بمشاعري وعواطفي و في نفس الوقت في واحدة عايشة معاه..
و هنا عرفت انه بيخدعني و ده كان أول ألم خدته منه..
مشيت فورا أنا و صديقتي من غير ولا كلمة.. لكن سيبت الفطيرة قدام الباب و نسيت اديله الكارت..
و غصب عني وانا سايقة طول الطريق كانت صديقتي بتكلمني و انا مش سامعاها ابدا.. كان كل اللي في دماغي الموقف اللي حصل..
و لقيته بعدها بيتصل بي و بيبعت رسايل كتير كلها اعتذار لكن أكد على نقطة اني بتجسس عليه..
مردتش عليه ابدا و فضلت مكملة ايامي و مركزة في اللي بعمله..
و حاولت سريعا اني اطلع نفسي من أي حالة نفسية سيئة بإني أستمتع بأي حاجة حلوة حواليا مهما كانت بسيطة و كتبت و قلت:
امضي في طريقي اليومي لممارسة رياضة المشي السريع المفضلة لدي و أشعر بسعادة كبيرة في قلبي، احمد الله على نعمه و أولها الرضا و ثانيها الطموح و انظر على جمال الطبيعة من حولي لتبتسم شفاتي من السعادة. تستوقفني شابة لطيفة في صحبة كلبها و تقول لي:” صباح السعادة , ما اجمل ان يبدأ الشخص يومه و هو يرى شخص سعيد مثلك” ارد عليها مؤكدة كلامها ” بالفعل انا سعيدة” اتمنى لها يوم جميل و امضي في طريقي .. طريق النجاح و السعادة
حاولت أستمد طاقتي و حماسي و سعادتي من مظاهر الطبيعة اللي حواليا و اللي ربنا محرمنيش منها ابدا..
و مع أول فرصة حسيت فيها إني أحسن رحت المول مع صديقتي و اتغدينا هناك وقضينا يوم جميل ..
و رديت على الأستاذ برسالة و قلت له:
“انت خدعتني و لعبت مشاعري و ده اللي ألمني.. عموما انا عند وعدي لو الصفقة تمت أكيد هرجع لك لأنك انت اللي عرفتني بالناس دول و طبعا حقك محفوظ”
و اتعاملت معاه انه ورقة وسقطت من على الشجر .. لكن للأسف مكانتش دي أخر الآلام..
و خلص شهر أكتوبر و هيبدأ شهر نوفمبر اللي هتكون أحداثه مختلفة نسبيا.. يا ترى إيه اللي هيحصل؟
المزيد
1