لقيت حماتي بتطلب مني اني الم كل هدوم ابنها في شنطة سفر و قالت لي:
“أنا هلم كل حاجته علشان اوديها له، و كمان التليفزيون ده بتاعه”
طبعا طلبها للتليفزيون أنا واجهته و قلت لها:
“التليفزيون ده مش هيطلع من بيتي، أما هدوم ابنك أنا هلمها بمعرفتي”
لقيت حماتي بتطلب مني اني الم كل هدوم ابنها في شنطة سفر و قالت لي:
“أنا هلم كل حاجته علشان اوديها له، و كمان التليفزيون ده بتاعه”
طبعا طلبها للتليفزيون أنا واجهته و قلت لها:
“التليفزيون ده مش هيطلع من بيتي، أما هدوم ابنك أنا هلمها بمعرفتي”
و لميت هدومه كلها بما فيها البدلة الأخيرة اللي كنت لسه جايبهاله من مصر و ملحقش يلبسها، و كانت حماتي واقفة على ايدي علشان تشوف أنا بشيل إيه من الدولاب..
و حطيت الحاجة في كيس اسود، لكن هي سألتني:
“هو معندوش شنطة سفر؟”
قلت لها:” لا معندوش.. و لما دخل البيت ده مكنش عنده غير يا دوب طقمين، لكن دلوقتي هدومه زي ما انتِ شايفة محتاجة شنطة سفر”
قالت لي:” طيب ممكن تشتريله واحدة مستعملة و أنا هديكي الفلوس؟”
قلت لها :” حاضر. تعالي بينا على محل الحاجات المستعملة”
و رحنا و اشترينا الشنطة، و لمت حماتي كل حاجته، و خدتها، و قابلته..
و قعدت تقول لي في اليوم ده:” خلاص من أول سبتمبر هيسكن في اوضة لأن نفسيته تعبانة من الملجأ”
قلت لها:” طيب كويس”
قالت لي:” و احتمال كبير يرجع شغله.. بقولك لو شغله القديم اتصل بكِ أوعي تقولي لهم على اللي حصل، و لو سألوكي كان فين قولي كان عامل عملية، أو أي سبب”
و برضو قلت لها:”ماشي.. لان من مصلحتي إني اكون عارفة مكان شغله على الأقل.. خصوصا إن جلسة محكمة الأسرة قربت، و طبعا ما قولتش لحد منهم أبدا.. و خصوصا حماتي، و محامي الهجرة اللي بقى عاملهم دعم كبير”
كنت بستعد كمان اني انزل مهرجان السينما، بس المرة دي هتكون وظيفة و عقد يعني فيها فلوس و مش تطوع زي الأول.. و كان لازم ألاقي حد يقعد بالولد لأني اكيد مش هكون مطمنه اني اسيبه مع حماتي، و أبوه خلاص حر طليق حتى لو عليه عدم تعرض..
و فعلا أتكلمت مع جارتي اللي ساكنة في خامس بيت بعدي، و وافقت آنها تقعد به.. و بكده الموضوع محلول، و الدنيا ماشية كويس نسبيا..
و في يوم و حماتي قاعدة رحت لها و سالتها:
“هو ابنك ما سألش على ابنه؟ طيب ما بعتلوش فلوس؟”
بصت لي و قالت لي:
“أكيد سألني بس هو خايف من عدم التعرض، و لسه مش عارف إيه اللي في دماغك! أنا مش عايزة أتدخل في الجزئية دي. أما بالنسبة للفلوس هو لسه ما رجعش الشغل، و معندوش فلوس هيبعت إيه بقى!.. ده انا اللي بأكله و بصرف عليه حاليا، و أديته إيجار الاوضة أول شهر اللي هيسكن فيها كمان كم يوم.. و على فكرة هو باع الدبلة كمان”
و من كل الكلام ده أتضايقت جدا من آخر جملة.. و بالرغم من إني كنت عايزة اخلص منه، بس حسيت إن بيعه للدبلة بمنتهى السهولة مؤشر إني مش هشوف منه أي حاجة حتى لو أتحكم لي، و هنا بقصد فلوس نفقة الطفل اللي حتى ما سألش امه إحنا عايشين أزاي خصوصا إن الجزء الخاص به من الفلوس ما بقاش حد بيدهوني، و بقيت بدفع لوحدي في البيت 1250 دولار من أصل 2000 و كل اللي بقبضه ساعتها كان 1400 دولار…
و بمناسبة البيت و الإيجار..طبعا كنت أنا مقررة خلاص إن من أول أكتوبر هكون سبت البيت ..كان من المنطقي إن الشاب الموجود في البيت يمشي، و افتكرت إن شهر سبتمبر مش هضطر أدفع الإيجار.. لأني دافعة تأمين، و بالتالي افضل حاجة انه يمشي كمان أسبوع..
كانت الفكرة إني فعلا فاتحته في الموضوع و بعتله رسالة من أول ما اكتشفت شربه للخمور والحشيش في البيت، لكن هو بعتلي وقتها رساله بيقولي:” مش طالع و هرفع عليكي قضية، وأنا عندي محامي”- فكرني وقتها بالنيجيري.. لكن أنا كنت عارفة و متأكدة إني هطلعه بمنتهى السهولة..
و فعلا بعت له رسالة بفكره فيها بالتاريخ انه يمشي يوم 1 سبتمبر، و هنا انفجر و طلع من اوضته و قعد يزعق، و قال لي:
“محدش هيطلعني من البيت ده ”
و بدل ما ازعق أو اجهد نفسي رحت اتصلت بالبوليس فورا، و فعلا جه البوليس و هو اللي كلمه، و تحول الشاب من شاب شرس لشاب أرنب، و جالي و اعتذر لي بعد ما البوليس مشي و فهمه انه من حقي إني أمشيه فورا، و خدوا عليه تعهد انه يمشي يوم 1 سبتمبر من غير ما يعمل لي مشاكل..
و جالي و هو عامل مسكين و بيحاول يستعطفني، و بصراحة مكانش فيه مجال لأي مسرحيات، و كانت كلمتي واحدة وأخيرة..
أما حماتي فكانت متفرجة، لكن الفضول كان قاتلها.. و الغريب إنها راحت تطبطب عليه، و حاولت تبين له أنها في صفه..
و الغريب إن بعد كده حكت لأبنها اللي أتحالف مع الشاب ده، و حاول يجيبه كشاهد في محكمة الأسرة يشهد إني غير متزنة نفسيا في محاولة انه ياخد مني الولد، و إني ما أحصلش على الحضانة الكاملة..
كان وضعي في البيت ده إني محتضنة اثنين أفاعي، و كل واحد منهم منتهز الفرصة علشان يعضني في الوقت المناسب، و يبخ سمه..
كنت بعد الأيام إن أول سبتمبر ييجي.. علشان الشاب ده يمشي، و من بعدها حماتي..
و افتكرت إن الهجرة كمان مكلمتنيش و حددت لي جلسة خاصة، و حسيت إن الموضوع فيه إن..
و اتصلت بمحامي الهجرة، و سألته:” طيب دلوقتي موكلك طلع و أنا ما اتحدد ليش جلسة خاصة ليه؟”
قال لي:” مش محتاجينها لأني عملت استئناف في طلبه.. انتِ ناسية إن له طلب ساري”
و فهمت إن المحامي بيلعب من وراء ضهري و مستغل فكرة إني مشغولة في كذا حاجة، لكن طبعا دي اهم حاجة..
و ما اتكلمتش معاه كتير، لكن اتصلت فورا بالهجرة علشان اعرف ايه الوضع بالظبط..
و قالوا لي:
“ اه لازم تبعتي لنا جواب تأكدي فيه انك مش عايزة تكملي الكفالة، و ترفقي معاه كل الأوراق اللي تثبت موضوع العنف الأسري لان لو ما عملتيش كده و بالاستئناف اللي المحامي عاملة هتطلع له الإقامة، و لو طلعت مش هتعرفي تعملي حاجة ساعتها”
و كويس إني فوقت في الوقت المناسب، و كمان الفكرة إن فرضا و ده مش هيحصل لو أنا كنت طلعت له الإقامة و إحنا منفصلين.. كنت هفضل مسؤولة عنه قدام الحكومة مدة 3 سنين، و لو فكر ياخد أي إعانة بطالة من الدولة، اكون مسؤولة مسؤولية كاملة إني ادفعها، و بالتالي هصرف عليه بدل ما يصرف أي حاجة بسيطة على ابنه، و افضل عايشة في ملحمة الأدوار المقلوبة فترة من الزمان..
و بدأت اكتب الجواب، و حضرت كل الأوراق، و بعتها بالبريد.. و اتصلت بمكتب الهجرة، و بلغتهم و قالوا لي:
“تمام من التاريخ اللي بعتي فيه الورق ده و هو 30 أغسطس.. استني شهر بالظبط، و هيجيلك جواب بيأكدلك إن طلب الإقامة اتلغى”
وأخيرا خلصت اهم مهمة، وأهم إجراء ..كنت حاسة حقيقي انه هم وانزاح..
لكن طبعا حاولت اكون لئيمة شوية خصوصا مع حماتي اللي كانت بتحاول تميل دماغي، و تقول لي:
“شوفي هي حياتك و مستقبلك لو عايزة تكملي مع ابني و لا لأ.. لكن ارجوكي خلي الإقامة لأن ابني دفع فلوس كتير فيها، و خلاص قرب ياخدها”
و بالرغم إني كنت خلاص بعت جواب الهجرة.. إلا إني كنت بتظاهر إني معملتش حاجة، وكل اللي كنت بقوله:
“ربنا يسهل”
و عدوا يومين و مشي الشاب، و خد معاه تكييفه، و كل محتويات اوضته، و خليته ينضفها قبل ما يمشي لأنها كانت قذرة جدا..
و فتحت باب الأوضة دي لأول مرة من ساعة ما اخدت الشقة.. و هيكون شهر سبتمبر مختلف وأنا عايشة في بيتي لأول مرة من غير مشاركة..
و خلاص كلها 10 أيام و حماتي تمشي كمان ويبقى البيت كله لي أنا و ابني .. و أخيرا هستمتع بخصوصيتي، و حريتي في بيتي لأول مرة من ساعة ما جيت كندا.. بعد حوالي سنتين و 4 شهور من الحرمان منها..
يا ترى إيه اللي مستنيني في سبتمبر ؟ و هل هلاقي مكان اسكن فيه بسهولة؟
المزيد
1