و بدأت سنة 2021 بداية خير و بداية قوية في نفس الوقت و هي تجديد عقد شغلي كمدرسة لريادة الأعمال لمدة 3 شهور كمان..
وده هيضمن لي إني أحول أقساط منتظمة للشقة على الأقل أول 3 شهور..
و أكيد اتطلب مني إني أكون مدبرة على الآخر علشان اقدر اوفق بين مصاريفي في كندا و الاقساط اللي أقدر أحولها لمصر..
و بدأت سنة 2021 بداية خير و بداية قوية في نفس الوقت و هي تجديد عقد شغلي كمدرسة لريادة الأعمال لمدة 3 شهور كمان..
وده هيضمن لي إني أحول أقساط منتظمة للشقة على الأقل أول 3 شهور..
و أكيد اتطلب مني إني أكون مدبرة على الآخر علشان اقدر اوفق بين مصاريفي في كندا و الاقساط اللي أقدر أحولها لمصر..
و هنا بدأت بكل جدية إني أدرس موقفي المالي و أحاول أشتغل على أني اقتصد جدا ..
مقدرش أنكر إن حياتي السابقة في دبي معلمتنيش الإقتصاد أبدا لكن كندا علمتهوني بجدارة..
طبعا الموقف ده و التزامي بالشقة خلى الموضوع جد أوي و مابقاش في مجال للعطلة أو عدم الجدية..
حاولت أكتب و أحسب كل حاجة بالورقة و القلم
حتى ميزانية أكلي وشربي اجتهدت جدا في إني أوصل لميزانية مية مية
لدرجة إني شاركتها على موقع من مواقع التواصل الإجتماعي علشان الناس تستفيد من تجربتي
لكن مش كله كان رأيه من رأي
بالرغم من مدى واقعيتها و سهولة تطبيقها كمان
و فعلا الميزانية دي فرقت معايا جدا و كتبت فيها:
بإختصار شديد أنا بعتمد على محلات معينة في التسوق دون الذهاب المحلات العربية أو المتخصصة الكبرى زي كوسكو و خلافه.. طبعا أنا قلت أن ال 300 دولار دول أكل و شرب فقط دون أضافة الحفاضات أو منتجات العناية الشخصية والمنظفات..
No Frills اتسوق منه الدجاج نوع سفرة و بشتري فرخة كل اسبوعين و أقوم بتقطيعها على 5 أكياس..
لحم مفروم نص كيلو كل اسبوعين لاني بطبخه مرة واحدة في الاسبوع
لحم بتلو مرة في الشهر
كيس سالمون نوع مجمد و كويس جدا ب 10 دولار و بيكفي 4 مرات..
حليب شراء كيس فيه 3 أكياس كل واحد لتر و ربع كل 4 أيام
الأجبان: نوع واحد بشكل أسبوعي و بحرص إني أجيب أنواع كويسة جدا لأني بعمل طبخات إيطالية كتير
12 بيضة كل أسبوعين
تفاح كيس كبير يكفي أسبوعين
موز كيلو في الأسبوع
طماطم كيلو كل أسبوع
الأرز كيلو في الأسبوع
مكرونة كيسين كل أسبوعين
لا أقوم بشراء أي سناكس أو عصائر لكن أشتري المكسرات أكياس صغيرة و المياة الفوارة و التوست الأسمر من دولاراما
أيضا أخصص ميزانية صغيرة للأسماك الطازجة و عادة اتسوقها من Osler Fish Warehouse
أما بالنسبة للخضروات و المخبوزات بقوم بشراءها من Valumart لأن المحل جودته أعلى من No Frills و مقارب لمستوى Loblaws و دائما عنده قسم مخفض و جودته ممتازة اتسوق منه مرتين في الأسبوع وأحيانا 3 لضمان استخدامي للأشياء في مدة قصيرة..
و فعلا الميزانية دي فرقت معايا جدا و بقى تركيزي اني بس ادفع ايجار بيتي و قسط العربية و مصاريف نثرية قليلة جدا و الباقي كله يتحول على مصر علشان يقربني لحلم الشقة بدل ما حاجة تعطلني و تبعدني عنه..
وعلى مستوى الشغل كانت الدنيا لطيفة و جميلة جدا خصوصا فكرة إني اشتغل من البيت دي كانت عبقرية.. كانت بتسمح لي إني اودي اني الحضانة و بعدين اطلع اتمشى ساعة يوميا على البحيرة و اسمع المزيكا اللي بحبها و بالتالي ببدأ يومي بطاقة كبيرة و مشاعر حلوة جدا.. كلها تفاؤل و سعادة
أما عن الكتابة فبعد كتابتي لأجزاء دبي الثلاثة قررت إني اتوقف شوية لأني مكنتش مستعدة نفسيا إني اكتب مذكرات كندا.. و لما كانت الناس بتسألني هتبدأي امتى في كتابة قصة كندا كنت دايما برد و أقول:” مش عارفة بس اكيد لما أحس إني مستعدة و عايزة أكتب هلاقي نفسي بكتب لوحدي”
و ده اللي اكتشفته عن نفسي في موضوع الكتابة.. انها بتهبط علي و بتسيطر علي في أوقات معينة و انا ما اقدرش اسعى لها ابدا و لا أسيطر عليها.. يعني بمعني أصح فهمت إني مش هقدر أجبر نفسي ابدا على الكتابة لأنها كلها نابعة من قلبي و ذكرياتي و دي لها حالة خاصة جدا و أثر نفسي مختلف..
و فضلت مركزة جدا طول شهر يناير إني أمشي بروتين يومي صباحي مبهج و يوم حافل بالشغل و الأهم إني كنت كل مرة و أنا بشرح أو بساعد حد في مشروعه الصغيرة كنت ستمد طاقة كبيرة و كمان كان من واجبي إني ادعمه و أزود حماسه خصوصا إن معظم الناس اللي قابلتها في البرنامج كان الإحباط بدأ يتسلل لها بسبب تعقيد وصعوبة سوق العمل الكندي..
كانت دي مصادري إني استمد الطاقة الإيجابية و بدأت أقنع نفسي شوية بشوية إن طاقة الحب مش موجودة.. الحب اللي اقصده الحب الرومانسي اللي كل مدى حس بمدى صعوبته و ندرته و بالتالي كان لازم استبدله بحب تاني..
يا ترى إيه هو الحب التاني؟ و قضيت عيد الحب فين ومع مين؟
المزيد
1