كنت من بداية شهر يوليو في مفاوضات… مع شخص بعتلي لما شاف الفيديو اللي نشره صاحب جروب في مونتريال على الفيس بوك، و كنت بتكلم فيه عن تجربتي في البيزنس، و إديت نبذة عن شغلي..
كان الشخص ده مصري، و كان عايش في قطر، بس اللي فهمته ان مراته واولاده هم اللي في كندا، وقريب جدا هو كمان جاي..
و طلب مني اني اساعده في اني اعمل له -بيزنس بلان- علشان يقدمها على برنامج خاص بهجرة رواد الأعمال… أو أصحاب الأعمال الصغيرة، و ده مختلف تماما عن هجرة رجال الأعمال..
كنت من بداية شهر يوليو في مفاوضات… مع شخص بعتلي لما شاف الفيديو اللي نشره صاحب جروب في مونتريال على الفيس بوك، و كنت بتكلم فيه عن تجربتي في البيزنس، و إديت نبذة عن شغلي..
كان الشخص ده مصري، و كان عايش في قطر، بس اللي فهمته ان مراته واولاده هم اللي في كندا، وقريب جدا هو كمان جاي..
و طلب مني اني اساعده في اني اعمل له -بيزنس بلان- علشان يقدمها على برنامج خاص بهجرة رواد الأعمال… أو أصحاب الأعمال الصغيرة، و ده مختلف تماما عن هجرة رجال الأعمال..
كان التقديم على البرنامج من خلال مركز (تي بي دي سي) اللي انا اتخرجت منه، و اللجنة اللي بتقيم المشروع كلها من المركز، بعد كده يتعرض على إدارة الهجرة الكندية..
و فهمت منه إن مراته جت عن طريق الدراسة، و هو ملتحق بها بس بيحاول يقدم على الإقامة الدائمة، و علشان كده كلمني علشان اساعده في الموضوع ده..
كانت مفاوضات كتير طول شهر يوليو، و رد علي و قال لي:
“انا جاي كندا في أغسطس، و أول ما أجي هكلمك و هنتفق، و بكده تقدري تبدأي شغل”
بس طبعا ما ينفعش حاطة إيدي على خدي لحد ما ييجي، و لازم أدور على مصدر للفلوس علشان على الأقل ادفع قسط العربية..
وافتكرت صديقتي الفنزويلية اللي كانت قالت لي على تطبيق على التليفون من خلاله اقدر اقدم على أشغال كلها بارت تايم، و كان اسمه (ستافي- Staffy)
كانت فكرته بسيطة جدا… إن الواحد يسجل بياناته و انه طبعا من حقه انه يشتغل بشكل قانوني في كندا، و يدور على الحاجات اللي تناسبه و اللي معظمها في مجال الفندقة و السرفيس..
كانت من مميزات الشغلانة دي إن فلوسها حلوة يعني المتوسط بين 18 -20 دولار في الساعة، و متوفرة دايما، و مغطية تورنتو وضواحيها..
و ما اترددتش اني ادور على حاجات تنفع خلال اليوم.. و فعلا رحت كذا حاجة وراء بعض لحد ما جيبت قسط العربية، و التأمين، و ببقية الفلوس جيبت شوية أكل يا دوب يكفوا أسبوع بالعافية..
و هنا افتكرت نفقة ابني اللي عمري ما اخدتها، و افتكرت كمان إن قريب جدا هيكون في جلسة خاصة بالحكم النهائي فيما يتعلق بحضانة الطفل.. كنت متغاظة جدا إني معرفتش اخد حق ابني من ابوه لما وصلت للمكتب اللي بيتابع الموضوع ده و اسمه FRO و قالوا لي:
“للأسف ما نقدرش نعمل أي حاجة تلزم الأب بدفع النفقة لأنه أثبت انه عاطل، و كمان قاعد في البلد بشكل غير قانوني”
و للأسف هو عمره ما فكر انه يبعت حتى الفلوس دي من نفسه من غير ما انا احاول اجيبها من بؤء ال ….
و استعوضت ربنا في الفلوس، و سلمت أمري لله..
و عوضني ربنا على طول بعدها بأيام.. بإن العميل اللي عايز (بيزنس بلان) وصل على كندا، و طلب يقابلني
و اتفقنا على كل حاجة، و دفع نص مبلغ الدراسة
كانت فلوس كويس، و قسمتها لجزئين:
الجزء الأول خليت أكمل به مصاريف الشهر
الجزء الثاني: حوشته علشان يكون جزء أقدر أغطي به مصاريف شهر سبتمبر
و بدأت اشتغل بكل ما أوتيت من قوة على الدراسة، علشان اساعد الشخص ده اللي كان ذوق و محترم جدا في تعامله معايا..
و لما زادت الفلوس شوية عن مصاريفي في شهر أغسطس.. فكرت فورا في ابني، و حاولت اعمل له حاجة علشان لما يكبر..
كنت من فترة استلمت جواب فيه شيك ب 500 دولار اقدر افتح بهم حساب RESP – و ده نظام بتشجعه الحكومة الكندية إن الأباء يفتحوا حساب توفير لتعليم الأبناء، و بيبقى فكرته ان الواحد يشيل فيه كل شهر لحد ما الطفل يدخل الجامعة.. بعد كده يسحب الفلوس دي، و بتساعد كتير في تعليمه..
و ما اترددتش، و رحت فتحت له حساب بإسمه، و عملت إيداع بال 500 دولار اللي هم منحة من الحكومة الكندية لفتح الحساب ده، و بدأت امشي على نظام إني احول له 25 دولار كل شهر، لكن الشهر ده انا عملت له إيداع بمبلغ 250 دولار مرة واحدة..
و لأن التخطيط رائع و بيوفر على الواحد كتير، فبصراحة أنا لقيتها فرصة، و محبتش أجل الخطوة دي أكتر من كده..
والحاجة التانية مكانتش محتاجة فلوس، لكن كانت محتاجة وقت.. و هي دروس سباحة لماريو
وسجلت له في مركز السباحة القريب من منطقتي.. والمفارقة أنه كان عند بيت أبوه القديم بالظبط..
و بدأت اوديه مرتين في الأسبوع، و كالعادة كان مكان جديد بالنسبة لي، و تعارف على ناس جديدة كمان
و اتعرفت على أم لطيفة جدا مع ابنها.. و عرفت إنها شرطية، بس في أجازة الأمومة بتاعتها
كانت ست لطيفة جدا.. روسية، و هاجرت مع أهلها من زمان.. من وقت ما كانت لسه في المرحلة الإعدادية..
و اتفقنا اننا نروح ناخد قهوة مع بعض، ونتمشى مع الأطفال عند البحيرة كمان
و وصلت لمنتصف شهر أغسطس و أنا كلي نشاط و حماس وحيوية .. تمام زي الجو الصيفي اللي شمسه ما بتغيبش..
لكن كان لازم اقابل المحامية، و استعد للجلسة النهائية لقضية الحضانة..
و اتفاجأت مفاجأة عمري في الجلسة دي.. يا ترى ليه؟
المزيد
1