كان التاريخ 24 نوفمبر 2017 يوم جمعة، و كنت خلاص قررت إني اروح للمشرف و أقوله على إني جمعت معلومات كافية خاصة بأجازة الوضع، و ناوية أخد إجازتي على أول فبراير 2018..
و فعلا رحت له و طلبت إني اقعد معاه في مكتب الاجتماعات، و طبعا خدت الوقت ده كوقت مستقطع و بدأت كلامي معاه و وقلت له:
“أنا جمعت كل المعلومات اللازمة بطريقة التقديم على أجازة الوضع و قررت إني أخد أجازة أول فبراير”
كان التاريخ 24 نوفمبر 2017 يوم جمعة، و كنت خلاص قررت إني اروح للمشرف و أقوله على إني جمعت معلومات كافية خاصة بأجازة الوضع، و ناوية أخد إجازتي على أول فبراير 2018..
و فعلا رحت له و طلبت إني اقعد معاه في مكتب الاجتماعات، و طبعا خدت الوقت ده كوقت مستقطع و بدأت كلامي معاه و وقلت له:
“أنا جمعت كل المعلومات اللازمة بطريقة التقديم على أجازة الوضع و قررت إني أخد أجازة أول فبراير”
وشه جاب ألوان و أتضايق جدا و قال لي:” طيب وليه بدري كده؟ ما تاخديها أول مارس”
قلت له:” لا أنا بدأت اتعب جدا خصوصا إني أيام و ابدأ الشهر السادس و الجو برد جدا و مع المواصلات بقى عذاب.. و أصلا لو كنت اقدر اقعد قبل كده كنت قعدت، بس مين عارف يمكن القانون يتعدل و اقدر اقعد بدري عن كده”
قال لي:”أي قانون؟”
قلت له:” قانون إجازة الأمومة.. يوم 3 ديسمبر البرلمان هياخد قرار خاص به، و لو أتوافق على مشروع القانون الجديد من حقي اقعد قبل الولادة ب 3 شهور بدل شهرين”
قال لي:” و لو حصل هتعملي كده؟”
قلت له:” آه .. أنا تعبت جدا من مشوار الشغل”
حاول يفهمني انه من مصلحتي اقعد اكتر، بس أنا عارفة أنه من مصلحته هو لأنه مكانش خلص تدريب الموظفين الجداد اللي قعدوا شهور و شهور علشان يعينوهم، و طبعا مش مشكلتي.. أنا استحملت كتير في المكان ده و جيت على نفسي اكتر..
لكن حسيته بيطلب مني بشكل إنساني و بيقول لي:” بس أنا مراتي حامل و قربت تولد في ديسمبر، و لو كده هطلع أجازة شهر و بصراحة وجودك أساسي في القسم”
قولتله:” ما اعتقدش إني هقعد في ديسمبر، لكن لو أتعدل القانون هقعد من أول يناير بالتأكيد”
كان حاسس إني قافلة جدا الباب ده و زي ما يكون حاطط ايده على قلبه إن القانون يتعدل، و أنا طبعا بدعي ربنا إن القانون يتعدل و اقعد و أترحم من العذاب..
كنت سعيدة من جوايا جدا و كان عندي أمل كبير إن القانون هيتعدل و خلاص كلها أيام و اعرف النتيجة..
و احتفالا بيني و بين نفسي، كلمت صديقتي الفنزويلية و قابلتها يوم أجازتي الأسبوعية و قررنا نروح مكان جديد مكنتش رحته قبل كده..
كان المكان هو اكبر كريسماس ماركت بيتعمل في تورنتو و كان مكانه (ديستلري ديستركت) و كان مكان كبير بينظم فيه معارض فنية، و وقت الكريسماس بيقام فيه سوق كبير و بيكون من اجمل و امتع الأماكن اللي الواحد ممكن يروحها..
وقتها كانت أول مرة صديقتي الفنزويلية تشوفني و أنا بطني كانت بدأت تكبر و كنت لابسة بنطلون الحمل، و أتمشينا و أتعشينا في مطعم ياباني شيك جدا هناك، بعدين دخلنا محل حلويات ضخم و خدنا جاتوة، و ختمنا اليوم بصورة جميلة عند قلب كبير موجود في مدخل المكان.. و وقفت أنا و هي اتصورنا جوه القلب، و افتكرت صديقتي البنت الجدعة من دبي، و أتمنيت إنها تكون كانت معايا في الوقت ده.. و فعلا حسيت إنها وحشاني جدا..جدا..
و إحنا مروحين و راكبين الأوتوبيس سألتني صديقتي على وضع روميو معايا و أخباره إيه؟ رديت بكل صراحة و من غير لف و لا دوران و قلت لها:” بصراحة مش مستريحة معاه.. حساه مش مسؤول، و لكن أتمنى انه يتغير لما البيبي يجي”
ردت و قالت لي:” أتمنى.. و لو إني عندي أحساس انه مش هيتغير، و ممكن لو أتغير هيكون للأسوأ”
كلامها كان مؤشر خطر، و لكنه واقعي جدا و ده فعلا اللي هيحصل..
و رجعت البيت و لقيت روميو نايم، و اتفاجأت انه قضى اليوم كله نوم، و لما سألته قال لي:” عادي أنا رجل بيحب ينام إيه مشكلتك؟”
استغربت رده جدا خصوصا انه كان مشجعني إني انزل واخرج مع صديقتي بدل ما اقعد أقوله أصحى اخرج معايا..
سكت و مرضيتش أجادله، لكنه بدأ يتكلم و قال لي:” اسمعي.. أنا مش عاجبني قصة السفر لوحدك، وإنك ناوية تصرفي الحوافز على السفر”
قلت له:” بس إحنا اتكلمنا في الموضوع ده قبل كده”
قال لي:” آه.. أنا معنديش مشكلة انك تسافري، بس خديني معاكي، و البديهي انك تسافري معايا جوه كندا علشان موضوع إقامتي”
قلت له:” و أنا معنديش مشكلة، بس كل واحد يدفع لنفسه أنا مش هدفعلك المرة دي”
قال لي:” ليه؟”
قلت له:” لأني بدفع مرتبي كله على البيت و أنا مصممة إن و لا دولار من الحوافز هصرفه عليك”
كلامي ضايقه جدا و كان ناوي يزعقلي و يعلي صوته بس تقريبا افتكر إن الدنيا ليل و الجيران ممكن يشتكونا ولا حاجة و قالي:
“عموما ماشي أنا لي تصرف معاكي في الموضوع ده”
كنت حاسة انه زي ما يكون بيخططلي لحاجة.. و فعلا عمل موقف عجيب جدا علشان هيتجنن من فكرة إني اصرف الحوافز على نفسي..
و جه أول شهر ديسمبر و دفع لي الأسباني نص شهر و ده لأنه هيمشي يوم 15 ديسمبر، و أنا طلعت جزء الفلوس الخاص بي ،و فاضل ال 600 دولار بتوع روميو..
رحت و قلت له:” أنا جمعت الفلوس فاضل الجزء الخاص بك هو فين؟”
قال لي:” أنا عندي خبر وحش علشانك”
قلت له:”هو إيه؟”
قال لي:” أنا بقالي أسبوعين سايب الشغل و كنت مخبي عليكي، و بالتالي ما ممعيش غير 300 دولار هم دول اللي هديهوملك”
بصيتله كده و أنا مصدومة جدا و كنت حاسة انه بينتقم مني علشان موضوع الحوافز و قلت له:” انت بتنتقم مني علشان مش عايزة اصرف الحوافز عليك و عايزني ادفعهم في الإيجار؟”
قال لي:” دي ظروفي و ده اللي عندي”
قلت له:” أنا مش هاخد ال 300 دولار، بعد إذنك أديني الفلوس كاملة و نبقى نشوف حكاية الشغل دي”
كان رد فعله غريب جدا ، و بمنتهى الوقاحة رمى ال 300 دولار على الأرض و قال لي:
“الفلوس على الأرض لميهم و ادفعيهم للإيجار ده اللي عندي .. انت فاهمة”
لما شفت الفلوس على الأرض و إهانته المباشرة لي صعبت علي نفسي جدا، لكن تماسكت لأبعد درجة و بقيت بعض على شفايفي علشان ما اعيطش مع إن قلبي كان هو اللي بيعيط لأني كنت صعبانة عليه جدا و رفعت رأسي و قلت له:
“أنا مش هوطي أبدا علشان أخد الفلوس دي حتى لو أخر يوم في عمري”
و فضلت الفلوس على الأرض، و هو دخل الحمام، و أنا جاتلي فكرة جهنمية.. يا ترى عملت إيه؟
المزيد
1