و رحنا كلنا الجلسة، وأنا فضلت قاعدة بره القاعة، ودخلت حماتي و دخل روميو.. بس كان طبعا في القفص وبالتالي أنا ما شوفتوش خالص..
و بعد مدة قصيرة جدا طلعت حماتي، والمحامي، والاثنين شكلهم مش مبسوط أبدا.. و جالي المحامي، وقال لي:
“زميله مجاش، والجلسة اتأجلت ليوم 25 أغسطس.. يعني كمان 3 اسابيع”
و اتصلت بزميله اللي قال لي:”أنا آسف مش هقدر اجي.. بصراحة دي مسؤولية كبيرة، وأنا مش عايز مشاكل”
و كان لمعرفتي إن زميله ده هو الشخص الوحيد اللي ممكن يكفله مفقدتش الامل انه يكون هو الضامن.. حتى بعد ما المحامي و حماتي فقدوا الأمل، وبهدوء شديد رديت عليهم، وقلت لهم:
“إحنا لسه معانا 21 يوم، وفي خلال الوقت ده أنا هقنعه، وأنا متأكدة انه هيجي المرة الجاية و يخرج أبو ماريو من السجن”
و مشينا و معانا البيبي اللي كان صعبان علي جدا مشواره كل شوية على السجن.. بدل ما أوديه الجنينة..
و بدأت تتكلم حماتي لما روحنا و قالت لي:
“أنا مش مستوعبة ابني هيقعد أزاي 21 يوم كمان في المكان ده!!.. ابني بيموت كل يوم من الناس اللي معاه، ومن المكان”
و حقيقي المكان كان مرعب و معروف عنه انه فيه كبار مجرمين أونتاريو، وروميو جه معاهم في الرجلين..
و لقيتها قاعدة منكسرة على جنب، وحاولت أخرجها من اللي هي فيه، وقلت لها:
“تعالي نفكر بشكل عملي وإيجابي.. الزعل مش هيعمل حاجة دلوقتي، ولسه عندنا 21 يوم، و زي ما قولتلك دي فترة كافية جدا إن زميله يقتنع حتى لو هو مش مقتنع دلوقتي.. و تعالي نغير الطاقة السلبية دي، ونعمل حاجة مختلفة..”
بصتلي وقالت لي:” نعمل إيه يعني؟”
قلت لها:” أنا ناوية افسحك فسحة حلوة.. هوديكي داون تاون، و نطلع نتعشى في مطعم شيك جدا، و اهو نفسح البيبي الغلبان ده شوية”
و وافقت و قالت لي:” ماشي يلا بينا”
و ركبنا المترو، و كانت أول مرة لها إنها تركب المترو.. بعدين رحنا أتمشينا عند ميدان (داندس).. و هو المكان اللي فيه شبه كبير من (تايمز سكوير) في نيويورك..
بعدين وديتها مطعم شيك جدا و جبنا اسماك، و جبتلها نبيذ أبيض و قلت لها:” كاس واحد بس.. مفيش سكر هنا”
بصت لى وقالت لي:” لا أنا هسكر في البيت مش هسكر هنا”
ضحكت و قلت لها:” صح كده..مش عايزين مشاكل”
و قعدنا نتكلم في حاجات كتير، و فتحت قلبها لي شوية، و بدأت تتكلم بشكل مختلف تماما عن أول ما جت لما كانت متحاملة على من غير سبب.. و تخيلت لو كان أسلوبها معايا كده من الأول إيه اللي كان ممكن يحصل..

و في الحقيقة أنا تأكدت إنها كانت سبب مش اكتر إني أتفك من الجوازة الغير مناسبة دي.. لأني فعلا ماكنتش عارفة اطلع من الفخ ده، لكن ربنا استجاب لدعوتي، وخصوصا دعوتي لما كنت في المستشفى و أنا لسه والدة..
حاولت اربط الأحداث ببعض، و حسيت و فهمت إن في حاجات كتير في حياتنا بتحصل لسبب، و مفيش حاجة ملهاش سبب.. و بدأت انتبه للنقطة دي من الوقت ده أكتر من الأول..
و رجعنا البيت و فعلا طاقتنا كانت حلوة، وهي كانت اهدأ، انا بدأت افكر في خطة لزميله علشان اقنعه بموضوع الكفالة..
و تاني يوم طلبت منه إننا نتقابل في الجنينة اللي جنب بيتنا و تكون معايا حماتي.. و فعلا جه و هنا بدانا نتكلم و قلت له:
“اسمع للأسف لما انت ما جيتش مبلغ الكفالة ارتفع من 4 إلى 8 الآف دولار يعني المرة الجاية لازم ندفع المبلغ ده”
قال لي:” ما هو أنا كنت خايف من المسؤولية بصراحة”
قلت له:” بس إحنا هنقفل الفلوس 10 الآف، و انت لك ألفين دولار، و باقي الفلوس هي الكفالة اللي اصلا هتكون باسمك بحيث إن انت اللي هتستلمها و تسلمها لزميلك لما يعدل وضعه، أو لو طلع له أمر بالترحيل…”
و كنت طبعا اتفقت مع حماتي على الكلام ده قبل ما نروح و وافقت إنها تديله ألف دولار دلوقتي و كتبته وصل، و بعدين الألف التانية لما نخلص الجلسة علشان تخلص ابنها من اللي هو فيه..
و أتغيرت تعبيرات وش زميل روميو تماما و قال لي: لو كده ماشي.. و أنا موافق”
و بلغت المحامي اللي أصلا كان حاسب الكفالة على 10 الآف من الأول لكن المبلغ الفعلي كان أقل، و حماتي بقت نفسيتها أحسن من الأول و قالوا لي:
“خلاص انتِ حلقة الوصل مع الضامن.. إحنا ما بنعرفش نتعامل معاه”
و فعلا كان في شوية حاجات كان لازم اتأكد منها قبل ما يحضر الجلسة الجاية منها سجله الضريبي، و أوراقه.. و بدأت اعمل له ملف هو كمان، و حسيت إني بقيت فاتحة نشاط فرعي محاماة كده على جنب..
و بدأت أحط في دماغي فكرة إنها كلها أيام و لما يطلع روميو هياخد حماتي و يعيشوا بره، و بكده تخلص الحكاية.. لكن اللي هيحصل كان غير كده خالص..
و في الوقت ده ظهر المغربي اللي عرف حكاية روميو، وكانت حكاية الشارع كله، و كانت كل الناس عارفة انه عضني، و وصلت الأخبار للمغربي..
و اتصل بي و صمم يقابلني، وحاول يفهمني إني لازم اقدم فورا على محكمة الأسرة علشان أطالب بحضانة الطفل ما دام أنا قررت الانفصال..
كنت مش مجمعة القصة و قلت له:” خلي بس امه تسافر و بعدين أبدأ ”
قال لي:” لا طبعا.. اسمعي اللي بقولك عليه ما تبقيش عنيدة..”
و سمعت له و حاولت استوعب فكرة إني داخلة على محكمة أسرة، و قضية مختلفة عن قضية هجرة روميو..
وقتها افتكرت الكارت اللي ادتهولي الست اللي شافتني و أنا بتعض و قالت لي:
“كلميني لو احتاجتي أي مساعدة خصوصا في الخطوات الجاية”

و كلمتها و خدت منها ميعاد إني اروح لها، وكانت في المركز اللي على اول شارعنا و اللي هتربطني به فترة كبيرة جدا،وهيغير حياتي بشكل ملحوظ..
يا ترى اتكلمنا في إيه؟ و إيه أول حاجة عملتها وفقا للخطة اللي حطيناها مع بعض؟

11