كانت المكافأة كبيرة لي و للبيبي، واللي ساعدني فيها التأمين الخاص بتاعي اللي بيغطي مساج بقيمة 500 دولار لكل واحد فين..و خدت البيبي وديته (بيبي سبا) وسجلت له في 6 جلسات.. كانت الجلسة ب 80 دولار و كانت شاملة سباحة في بسين مخصص للبيبيهات في مكان نضيف و جميل جدا، وبعد كده جلسة مساج رائعة و كان مبسوط جدا، ومزقطط..
كنت كمان مبسوطة و انا شايفاه مبسوط، وكنت بحاول اسعده على قد ما اقدر و في حدود امكانياتي.. و ربنا يخلي التأمين الخاص..
بعدها خدت نفسي و رحت على مكان جميل في دوان تاون قريب جدا من الإسكان، بس فرق شاسع بين مشوار الإسكان و مشوار المساج اللي رحته..
كانت المكافأة كبيرة لي و للبيبي، واللي ساعدني فيها التأمين الخاص بتاعي اللي بيغطي مساج بقيمة 500 دولار لكل واحد فين..و خدت البيبي وديته (بيبي سبا) وسجلت له في 6 جلسات.. كانت الجلسة ب 80 دولار و كانت شاملة سباحة في بسين مخصص للبيبيهات في مكان نضيف و جميل جدا، وبعد كده جلسة مساج رائعة و كان مبسوط جدا، ومزقطط..
كنت كمان مبسوطة و انا شايفاه مبسوط، وكنت بحاول اسعده على قد ما اقدر و في حدود امكانياتي.. و ربنا يخلي التأمين الخاص..
بعدها خدت نفسي و رحت على مكان جميل في دوان تاون قريب جدا من الإسكان، بس فرق شاسع بين مشوار الإسكان و مشوار المساج اللي رحته..
كان مكان 5 نجوم و الجلسة كانت ب 140 دولار و شاملة حاجات كتير من مساج- بسين- ساونا- غداء في المطعم التايلندي..
و دفع التأمين المبلغ لحد 110 دولار وانا الفرق يعني .. 30 دولار..
طبعا شحنة ايجابية كبيرة، ومكافأة استحقها عن جدارة..
و في وسط الزقططة دي لقيت تليفون من والدة المغربي عازمة نفسها عندي، وجاتلي البيت و لقيتها بتقول لي:
“انا محتاجة مساعدتك.. انا بدور على سكن لأن ابني مش طايق اني اقعد معاه.. ينفع اقعد معاكي في البيت خصوصا انه كبير؟ و اهو اقعد لك بالولد لو احتاجتى”
كلامها ماريحنيش.. ثانيا خلاص كلها اسبوع و ابني هينزل حضانة و انا هبدأ اخد دورة تدريبية خاصة في البزنس، يعني مش محتاجة حد يقعد لي بالبيبي ولا حاجة..
و سألتها:” و ليه ابنك مش عايزك تقعدي معاه؟”
قالت لي:” لاني بقعد كتير و باجي اشتغل و بحاول اظبط اقامتي، و هو مش راضي يساعدني.. تخيلي مش عايز يقدم لي على الإقامة.. ما تعرفيش سكة أو طريقة لي”؟
و معجبنيش الكلام خصوصا اني لسه طالعه من تجربة اقامة، و مصالح مريعة، و بالتالي كان لازم اقفل الباب ده نهائي و قلت لها:
“للأسف مش هقدر اساعدك.. و بخصوص البيت ما اقدرش اسكنك.. انا نفسي قاعدة على كف عفريت”
و فعلا قفلت الباب ده، واعتذر لي ابنها على القصة، وقال لي:
“مالكيش دعوى بها و انا مش هساعدها.. هي غاوية بهدلة.. عندها بيت في المغرب، و تقدر تعيش مع اختي في إيطاليا في بيتها و جوزها، لكنها غاوية بهدلة و تيجي هنا و هي عدت الستين علشان تدور على شغلانة في مطعم و تغسل الصحون .. بصراحة انا مش عاجبني اللي بتعمله”
طبعا ماكنش لي اتدخل بينهم، لكن كان من حقي اني ارفض مساعدتها، و هي بقى منها لابنها!
أما هو فكان قريب جدا مني في الفترة دي و كان فعلا بيحاول يساعدني بمعلومة أو حتى بتليفون .. كنت بحس بمشاعره، لكن انا مكانش لي أي مشاعر ناحيته، و كمان كانت فترة حساسة جدا بالنسبة لي و مكانش ينفع في ادخل في اي علاقة عاطفية بالمرة..
و لأنه مره بكل مراحل الانفصال و الطلاق فكان بيوجهني جدا في النقطة، دي و كنت بستشيره فيها..
و قرب نهاية شهر أكتوبر جالي خبر حلو جدا.. و هو موافقة الحكومة على فلوس الطفل، و اتصرف لي مبلغ كبير مقارب على ال (1500 دولار) و اتحط لي في حسابي في البنك..
كنت طايرة بالخبر، و خلاص من هنا و رايح هتدخلي فلوس البيبي اللي حوالي (500 دولار) لأني سينجل مام..
و فكرت انى احوش الفلوس دي، و اجمع عليها قرشين كمان و اجيب عربية مستعملة خصوصا ان عندي جراج في بيت الاشباح..
لكن طبعا مخدتش القرار النهائي، بس النية بقت موجودة..
كان فاضل على نهاية اكتوبر أيام، و هنا كان تاريخ أول ورشة عمل هنظمها في مركز السيدات و الخاصة بالتوعية الصحية..
و جهزت حاجتي، و كان في حضانة ملحقة بالمركز قعدوا بالبيبي، و انا درست لمدة ساعتين كاملين لجروب كبير.. و في النهاية كجزء من الورشة كان فيه نشاط رقص كنوع من الانشطة الحركية، و خليتهم كلهم يقوموا يرقصوا بلدي على موسيقى (شيك شاك شوك)..
و بعد الورشة بيومين جاني أول شيك من المركز، و كنت حاسة ان الشهر ده جايلي بفلوس و خير كتير.. و زودت الفلوس دي على فلوس العربية.
و لتوديع شهر أكتوبر احتفلنا بالهالوين انا و البيبي، و جبتله طقم على هيئة دب من محل (ثريفت ستور)وكان تمنه 4 دولار من أصل 40، وكان شكله جميل جدا.. و خدته و اتمشينا ناحية بيتنا القديم، و سيبنا منطقة الاشباح.. و فعلنا لقينا فقرات حلوة ناحية بيتنا القديم، و ساحر، و كمان (دراكولا)..
و اتصور البيبي مع دراكولا و كان بيضحك و مش خايف ابدا..كنت بضحك على ضحكه و بقول في سري :شكلك جريء زي مامتك..كنت عايزة اقول لدراكولا لو شفت البيت اللي احنا قاعدين فيه هتعرف ان احنا اللي بنخوف مش انت..
و رجعنا البيت، وكانت ليلة (الهالوين) و كانت المنطقة مرعبة جدا، و زاد عليها الضباب و البرد..
و بعد شوية… سمعنا ضرب نار في المنطقة كلها، وطلعت جري بالبيبي على اوضة النوم في الدور اللي فوق، و حاولت ابعد عن الشباك، و استخبينا تحت السرير لحد ما ضرب النار وقف..
و تاني يوم عرفنا انه حصل جريمة قتل، و اتنين اتقتلوا في ضرب النار ده، و شوفت الدم و شريط البوليس الاصفر استفتاحا بشهر نوفمبر..
كنت حاطة امل كبير ان بيت الحكومة يكلمني خصوصا ان طلبي بقى سليم ومقبول انه سريع و اولوية، لكن فاضل لي اختار و اعمل قائمة زي قائمة تنسيق الثانوية العامة كده..
و فعلا كلمت الموظفة الطيبة اللي هتساعدني اكتب و اختار صح جدا علشان ملاقيش نفسي في بيت زي اللي انا فيه ده.. كله عصابات، وناس مجرمة، و دم ،و شريط بوليس أصفر..
يا ترى كتبت ايه؟ وايه هي الكلمة السحرية في اختيار سكن الحكومة في تورنتو؟
المزيد
1