طبعا موضوع الفاميلي دكتور ده حاجة مشهورة و أساسية في كندا و مختلفة عن مرحلة دبي تماما بالنسبة لي و مصر كمان..
أول ما جيت على كندا في 28 مايو 2016 رحت على طول و قدمت على انه يطلعلي كارت الصحة المجاني اللي أسمه OHIP ،و اللي أسمه بيتغير على حسب المقاطعة، لكن ده أسمه في مقاطعة أونتاريو..
بعدها ب 3 شهور، جالي الكارت على البيت و كان مطلوب مني إني أختار طبيب العائلة(فاميلي دكتور)، و فعلا أخترت على حسب السكن و رحت أول زيارة..
كانت دكتورة هندية في مركز قريب جدا مني و كنت مش عارفة إيه نظام الزيارة، لكن اتفاجأت جدا من طريقتها و اللي بدأت و سألتني:
“عندك أمراض سابقة؟”
“بتاخدي أدوية معينة؟”
و رديت على السؤالين، لكن حبيت أوريها ساعتها أيدي اللي كان لسه فيها أثار خفيفة من الأكزيما ولقيتها بتقولي:
“لا انت فاكرة انك جاية مكان خاص! أنت في الزيارات دي مسموحلك بسؤالين/ حاجيتن فقط و بعد كده تكون الزيارة انتهت”
طبعا جننتني و رديت عليها وقولتلها:” و انت فاكرة نفسك في الهند! انت بتعاملني ليه كده؟!”
هزت كتافها و ردت بسخرية شديدة:” انت اللي بس جديدة في البلد و فاكرة ال OHIP ده تأمين صحي خاص”
و مشيت من المكان ده و قررت إني أطلب تغييرها. و فعلا غيرتها لمكان تاني.. كانت عيادة walk in و ده عيب كبيراكتشفته لما بيكون في عيادة دكتور العيلة أو الفاميلي دكتور..
كان الدكتور صاحب العيادة باكستاني و كان معاه دكتور تاني، و كانت موظفة الريسبشن معرفش منين بس ممكن تكون من باكستان برضه، و لكن كانت طريقتها في المعاملة كأنها معلمة في المدبح..
كان معظم اللي بيروحوا هناك كبار في السن و كان معندهمش أدنى مشكلة إن يكون ميعادهم الساعة 10 ص و يدخلوا الساعه 1ظ مثلا من غير ما يفتحوا بؤهم..
و بالرغم إن المكان كان بيسمح للواحد انه ياخد ميعاد، إلا إن فكرة ال walk in أو إن حد ييجي من غير ميعاد كانت بتخلي العيادة زحمة، واللي بيروح بيبقى عامل حسابه إن اليوم رايح عندهم علشان بس ميعاد واحد..
وقتها ما فكرتش أغيره خصوصا إني مكنتش محتاجاه أوي، لكن بعد كده هوريهم اللي عمرهم ما شافوه بعد ما روحتلهم كذا مره..
لما كلمت الدكتور المرة دي طلب مني إني أجيب روميو معايا، وأنا كمان حبيت يكشف عليه بالمرة خصوصا انه دايما كان بيشتكي من ظهره و كنت عايزة اعرف الحكاية دي..
و رحنا مع بعض و أداني جواب موجهة للدكتورة المتخصصة علشان ابدأ أتابع معاها الحمل، أما بالنسبة لروميو فقالي:
“ده معندوش كارت تأمين (طبعا الكارت ما بيطلعش إلا لحد له وضع قانوني في البلد)، روحي أدفعي 60 دولار قبل ما أكشف عليه”
و فعلا دفعت الفلوس ورجعت و كشف على ظهره و قالي:” ممكن يكون عنده مشكلة صغيرة، لو عندك تأمين انصح توديه مساج أو عند مصحح العظام (كايروبراكتكر) أو الأثنين مع بعض..”

و سألت التأمين اللي عندي و قالولي:” آه من حقك انت و جوزك إن كل واحد متغطي بالخدمات دي و هي خدمات خاصة طبعا و بره التأمين. و معاكي 500 دولار لكل شخص لكل خدمة بس لازم جواب من الفاميلي دكتور”
و خدت الجواب له و لي بالمرة، و بدأت أدور على الأماكن اللي نروحها علشان المساج و مصحح العظام بالنسبة لروميو..
و فعلا لقيت مكان جميل جدا قصاد بيتنا على طول و كان متخصص في المساج و كان باخد 90 دولار في الساعة، أما مصحح العظام فلقيت عيادة قصاد الكافية الإيطالي المفضل و كان عاملنا سعر مخفض لما عرف إننا جيرانه و اتفق معانا على 30 دولار في الجلسة..
و بكده روميو هيكون متغطي صحيا- مساج و مصحح عظام طول ما أنا شغالة في الشركة و معايا التأمين الخاص..
كمان من ضمن منافع التأمين الخاص انه كان من حقي أنا و هو إن كل واحد يجيب نظارة نظر أو شمس قيمة 500 دولار، و خدته من ايده و رحنا جيبنا نظارات (دولتشى جبانا) و واحدة (فيرزاتشى) علشان نكمل الشياكة.
طبعا روميو كان حاسس إني مصباح علاء الدين، وأي حاجة بيعوزها أو أصلا قبل ما بيفكر فيها بتتحقق.أما أنا مكنتش حاسة انه بيحققلي أي حاجة بصراحة..
و كالعادة كان غير مستقر في شغله، وإتخانق معاهم، و لكن دور فورا على حاجة تانية قبل ما ألومه على تصرفاته..
و بالنسبة لي بدأت اقتنع إني لازم افكر بشكل عملي بخصوص العربية .. أنا طبعا كان نفسي أجيب عربية، لكن عدم ثبات دخل روميو و اللي مخليني متحملة فوق طاقتي وتقريبا بدفع ضعفه في كل حاجة خلتني ابدأ أسأل نفسي:” هو أنا لو جيبت عربية هصرف عليها منين؟ طيب خليني كده أحسبها..”
قعدت و مسكت الورقة و القلم كالمعتاد وبدأت احسبها، و لقيت إني لو جيبت عربية بالقسط و مع تأمينها و بنزينها هحتاج أقل حاجة ل 700 دولار، و ده مكانش متوفر معايا.. و هنا بدأت أقول لنفسي:”ظروف روميو وحشة في الشغل علشان وضعه في البلد، لكن أنا متأكدة انه هيتحسن لما ياخد الإقامة و يمكن ده الوقت اللي اقدر أجيب فيه عربية”
و لقي روميو شغل بسرعة الوقت ده و قالي:” أنا مش عايزك تقلقي. أنا وعدتك إني هعمل ما بوسعي علشان ماريو، و طبعا لما أخد الإقامة هشتغل حاجة مناسبة، و حياتنا هتبقى أحسن بكتير”
و فضلت مصدقاه عادي خصوصا انه فعلا جاب شغل في 24 ساعة المرة دي..
لحد ما قررت إني أعمله مفاجأة و احجز يومين في فندق كبير عند شلالات نياجرا. وانطلقنا، و بدأنا رحلتنا إننا خدنا أوتوبيس صيني بيودي الناس يلعبوا في (الكازينو) اللي في نياجرا، و لكن ممكن أي حد يركب معاهم، و لما اكتشفته عرفت إننا بدل ما ندفع فلوس كتير في المواصلات، مع الاوتوبيس ده بندفع 10 دولار على الشخص في الاتجاه الواحد و بيودينا عند الشلالات بالظبط..
طبعا اكتشاف حلو و موفر، و رحنا الفندق اللي كان عامل عرض مغري و كانت الليلتين ب 250 دولار بس الأكل على حسابنا..
و أتبسطنا جدا و بدأت أتقمص دور المرشدة السياحية، و قضينا أول يوم في رحلة المركب و قربنا جدا من الشلالات و دي حاجة مكنتش عملتها لما زرت شلالات نياجرا المرة اللي فاتت..
و تاني يوم رحنا قضينا اليوم كله في مدينة (نياجرا اون ذا ليك) و عجبنا بيت جدا و صممت إني أطلب الرقم اللي كان محطوط عليه علشان كان معروض للبيع..
و جه الشخص و فرجنا عليه من جوه و بدأنا نتكلم معاه إن إحنا هنفكر و نرد عليه. و كان البيت ب مليون و 800 الف دولار و يمكن إحنا الاثنين كان في جيبنا ساعتها 200 دولار..
و بالليل أتفسحنا و رحنا ملاهي حلوة جدا، و بعدها أتعشينا في مكان جميل و كان روميو طاير من السعادة و هو بيقولي:
“أنا معاكي بلف العالم و بشوف الدنيا ..أشكرك يا روزة”

طبعا كان طول الوقت بيكلم أهله و كانوا معانا في الفسحة دي لحظة بلحظة..
و خلصت الرحلة الجميلة و جددنا طاقتنا، و فضلت طول ما أنا راجعة في الطريق أفكر في بيت الأحلام اللي دخلناه و أتمنينا إننا ننقل فيه مع بعض..
كمان أتمنيت إني أجيب عربية و أترحم من عذاب مواصلات الشغل، و اللي كنت خلاص مش قادرة عليها.. هل فعلا هاخد القرار و أجيب العربية حتى لو مش قادرة ماديا و لا هكمل في الأوتوبيس؟

9