واتفاجأت أن روميو مصمم إنه يحضر معايا أخر حصة من حصص ال (بري نيتال)، و رحنا مع بعض للمركز اللي أسمه (مركز تورنتو للولادة).. وهناك حضرنا أخر حصة نظرية، بعدين نزلنا عملنا جولة في المركز و اللي كانت ألوانه مبهجة جدا و عرفنا انه صمم خصيصا للسكان الأصليين و اللي نادرا ما بييجوا يولدوا فيه، لكن كل الديكورات و الألوان مستوحاة من تراثهم..
و دخلنا أوضة كبيرة جدا من ضمن 5 أوض تانيين، و لاحظنا أن معظم الأوض فيها بانيو كبير و بدأت الميد وايف تشرح لنا و تقول:
واتفاجأت أن روميو مصمم إنه يحضر معايا أخر حصة من حصص ال (بري نيتال)، و رحنا مع بعض للمركز اللي أسمه (مركز تورنتو للولادة).. وهناك حضرنا أخر حصة نظرية، بعدين نزلنا عملنا جولة في المركز و اللي كانت ألوانه مبهجة جدا و عرفنا انه صمم خصيصا للسكان الأصليين و اللي نادرا ما بييجوا يولدوا فيه، لكن كل الديكورات و الألوان مستوحاة من تراثهم..
و دخلنا أوضة كبيرة جدا من ضمن 5 أوض تانيين، و لاحظنا أن معظم الأوض فيها بانيو كبير و بدأت الميد وايف تشرح لنا و تقول:
“هنا الأم اللي طبعا هتولد طبيعى بتدخل البانيو و بتولد في البانيو”
استغربت الكلام جدا و قلت لها:” يعني دي ولادة مائية؟”
قالت لي:” بالظبط كده”
طبعا فهمت إن النوع ده من الولادة مناسب جدا لو واحدة هتولد طبيعي، و طبعا مش مناسب أبدا لو قيصري.. و أصلا المركز كله مخصص للولادة الطبيعي، أما القيصرية فلازم تكون في المستشفى..
و كان للجولة تكملة في اليوم اللي بعده، بس ما رحتش طبعا مع روميو، لكن رحت مع الميد وايف بتاعتي اللي كانت لطيفة جدا و بقت هي الصديقة و اكتر حد عاملي دعم نفسي بعد ماما طبعا..
كانت المستشفى هي (ماونت سايناي) أو لو ترجمناها هتكون (جبل سينا) و دي اللي كان سكني تايع لها..
و رحت و شفت الأوض و كانت حلوة، لكن اكتشفت إن التأمين الصحي العام الخاص بالدولة هيغطي الولادة، أما الأوضة اللي بقعد فيها بعد الولادة فهكون مع 3 ستات تانيين و يفصل بينا ستاير.. بصراحة معجبنيش الكلام ده و سألت الميد وايف لو في طريقة أدفع بها الفرق و أكون في أوضة لوحدي.. لكن ردت و قالت لي:
“بما إن عندك تأمين خاص تبع شغلك القديم من حقك تاخدي أوضة اسمها – سيمي برايفت يعني هتكون أنتِ و واحدة تانية بس معاكي في الأوضة و الفرق هو اللي تدفعه شركة التأمين و بتكون حوالي 200 دولار في اليوم..
كانت ملحوظة مهمة جدا و هستفيد منها وقت الولادة و ده اللي فعلا هيحصل..
كانت المستشفى صرح كبير في وسط(الداون تاون) و سألتني الميد وايف: مين اللي هيجيبك على المستشفى أو مركز الولادة لما تحسي بالألم الوضع؟
قلت لها:” هطلب أوبر..
قالت لي:” لا أطلبيني أنا و أنا اللي هوديكي المستشفى و هاخد ماما و جوزك معانا أكيد..
كانت فكرة الميدوايف الرائعة انهم 3 .. واحدة أساسية و اثنين ثانويين علشان لو واحدة منهم بتولد الاثنين الثانين يكونوا موجودين وقت ولادتي و ده برضه اللى هيحصل..
و بعد ما بدأت استعد نفسيا أكتر لفكرة الولادة..الاقي نفسي بيزيد خوفي و توتري.. و تزامن مع الوقت ده إنه جالي ناس كتير على البيت من اللي فوتوا البيبي شاور، و كانت أولهم جارتي أم البيبي و جابتلي حاجات كتير للبيبي..
بعدها جت جارتي المدرسة اللي في البيت الخامس و جابت هدايا تنفع جدا لبيبى لسه مولود من بطاطين و لفف لحد لسه حديث الولادة..
و أخيرا جت زميلتي الفرنسية الكندية اللي جابت 4 شنط مليانين على أخرهم: من ملابس، وخلاط، ولعب، وحاجات تخطر على بالي و ما تخطرش على بالي..
كانت كل حاجة موجودة بس كان فاضل حاجتين:
الحاجة الأولى: إن العفش اللي كنت مقدمة عليه من فيرنتشر بنك يوصل، بس كان لسه مافيش ايميل جالي من المؤسسة
والحاجة التانية و الأهم: البيبي نفسه..
و بكده وصلنا ليوم 28 مارس اللي كان فعليا نهاية الشهر التاسع كله و بدأ توتري يزيد جدا و اروح لماما وأقول لها:
“هو فيه ستات يا ماما ممكن تولد في العاشر؟” هو أنا حامل في فيل و لا إيه؟”
كانت تضحك و تقول لي:” معلش اصلها الولادة البكرية.. ما تخافيش..”
كنت بحاول ما اخافش، بس بصراحة بدأت أتوتر جدا.. و كمحاولة أخيرة مني إني اشتت نفسي و إني أفسح ماما قبل ما اولد، قررت اروح أنا و هي نتغدى في المطعم الياباني و كانت أول مره ماما هتجرب فيها الأكل الياباني..
حاولت اطلب الحاجات اللي هتعجب ماما، وركزت على السالمون في كل حاجة، وطلبت كمان وجبة الغداء الجميلة بتاعتهم و اللي بتيجي في شكل صينية مقسمة لمربعات كل مربع فيه حاجة مختلفة من سلطة لرز لسالمون لجمبري مقلي على طريقة (تامبورا).. و طبعا ما فاتنيش الحلو، و طلبت لي و لماما أيس كريم بالشاي الأخضر، والزنجبيل.. و كانت المفاجأة إن الأكل عجب ماما جدا..
كنت مبسوطة إني قدرت أفرح ماما، و إني ما زلت قادرة اخرج و استمتع بالوقت معاها، بالرغم من قلقي وتوتري الشديد اللي كنت بحاول أخبيه..
و عدى كم يوم، و وصلنا ليوم 31 مارس و اللي بدأت احس فيه بآلام الولادة، بس مكانتش قوية.. لكن الصدفة الغريبة إني مش أنا بس اللي كنت بتألم، كانت قطتي بتتألم لأن كان طلعلها خراج كبير و كان مخلي حرارتها مرتفعة و بطلت تاكل..
و بالرغم من تعبي الشديد وقتها جريت بالقطة و رحت بها على العيادة البيطرية و قالوا لي:
“القطة محتاجة عملية فورية و هتتكلف 900 دولار”
طبعا مبلغ كبير جدا و يمكن كان كل اللي أملك في حسابي، لكن ما اترددتش لحظة و دفعت كل الفلوس اللي معايا و أنا عارفة إن ربنا هيعوضني خير خصوصا إني داخلة على ولادة..
و عملت القطة العملية و رجعتها على البيت، و بقيت بمرضها و أغير لها على الجرح بقية اليوم لحد ما خلص أخر أيام شهر مارس.. و بدأ شهر أبريل و اللي من أول ساعة فيه حسيت بآلام غير محتملة..
يا ترى هولد فعلا و لا كانت كدبة أبريل؟
المزيد
1