كان المعرض في مدينة اسمها (تشاتام كينت- Chatham Kent) مدينة صغيرة جدا و تبعد عن تورنتو حوالي 300 كم، يعني بالعربية هتاخد 3 ساعات سواقة علشان نوصلها..
و هنا طبعا كان لازم اشوف هروح ازاي خصوصا اني لسه مش متمكنة خالص من السواقة و كنت بخاف جدا..
و طلبت من مدرب السواقة الصربي انه يوصلني و يقضي اليوم معايا في المعرض و يرجعني.. و جاوب علي و قال:
“ اكيد معنديش مشكلة خالص، وعلشان خاطرك انتِ هاخد منك بس 50 دولار ما هي العربية عربيتك”
و اتفقت معاه، بس مكنتش حكيتله بالظبط عن طبيعة المكان اللي رايحينه
و اخدت معايا عينات للملح الصخري على امل اني الاقي الشركات اللي بتتعامل مع البلديات عارضة هناك..
و لبست فستان مناسب للمعرض و جزمة مريحة جدا علشان أعرف الف بها وأخد المعرض بالطول و العرض..
لكن لاحظت ان المدرب كان بيبص علي من وقت للتاني و قال لي:
“تعرفي ان وشك جميل و بريء أوي، و ضحكتك تجنن”
حاولت اني ارد عليه بطريقة ناشفة لأن الاسلوب ده مكانش عاجبني خصوصا انه كان بيخططلي، و كان بيرسم علي علشان يحقق أهداف عنده.. بس على مين!
و غيرت نبرة صوتي، و بطلت أبتسم، و قلت له:
“يا ريت تركز في الطريق علشان نوصل بالسلامة و سيبك من وشي و ضحكتي”
وبدأ يغير الموضوع و حاول يلف من ناحية تانية وقال:
“انتِ عارفة انا عندي مشكلة في رجلي سببها حادثة حصلت لي هنا.. و بسببها دخلت في متاهات كبيرة، و الحاثة دي قضت علي.. حتى بسببها انا و مراتي السابقة سيبنا بعض..
حاولت ابين اني متعاطفة معاه، بس برضه كان نفسي افهم اللي في دماغه فبينت له اني عايزة اسمع القصة و قلت له:
“ياه و بعدين؟”
قال لي:” و بسبب الموضوع ده صرفت كل فلوسي، و انتهى بي الحال اني بدور على بيت و ما بقاش عندي سكن دائم”
قلت له: طيب ما تقدم على بيوت الحكومة”
قال لي:” قدمت بس هاخد سنين و سنين.. إلا قوليلي صحيح.. البيت اللي انتِ عايشة فيه ده تبع تعاونيات الحكومة؟”
قلت له:” اه”

قال لي:” و نقلتي فيه إزاي؟”
و حكيتله نبذة مختصرة.. بس منها عرف اني منفصلة عن جوزي اللي عضني و بسبب العضة دي كنت مؤهلة لبيت الحكومة
و وسعت عينيه و قال لي:” يا بختك”
و فضلنا ساكتين لحد ما وصلنا المعرض و قلت له:”ممكن تقعد تستناني في الاستراحة دي لحد ما اخلص جولة المعرض”
لكن من فضوله الشديد فضل يلف ورايا و مر حتى على شركة كنت اتكلمت معاهم، و عرف منهم اني عندي مكتب استشارات و بحاول اسوق للملح الصخري من مصر..
و قابلته في مكان الاستراحة و قعد و قال لي:” انا عرفت من شركة انك عندك مكتب خاص بك و بتسوقي للملح الصخري.. انت ِ إزاي فكرتي في الافكار دي؟.. انتِ عبقرية”
ضحكت وقلت له: لا عبقرية و لا حاجة .. بس انت كنت ماشي ورايا بتتجسس علي؟!”
قال لي:” لا انا كنت بحاول اشوف لو هتحتاجي مني اي مساعدة”
مش عارفة ليه من طريقته و من كلامه كان بيفكرني بروميو، و كنت شايفة انه عايز يستغلني مش اكتر..
و سيبته في مكانه علشان اكمل جولاتي، و اللي كانت ناجحة جدا..
اتعرفت من خلال المعرض ده على شركة كبيرة في أونتاريو مسؤولة عن استيراد الملح الصخري و خدت رقم مسؤول المشتريات، و اتفق اني انسق معاه ميعاد اقابله لما نرجع على تورنتو
أما الشركة التانية فكانت من مدينة اسمها (تروا ريفيير ) في مقاطعة (كيبيك) و اتقابلت فيها مع شاب كان مسؤول توريدات الملح الصخري للشركات اللي بتتعامل مع البلديات هناك.. و خد مني العينات، و فورا قال لي:
“اسمعي انا هحدد لك ميعاد مع 3 شركات في (تروا ريفيير) كمان 3 ايام.. هتقدري تيجي؟”
و بدون أي تفكير رديت و قولت:” ايوه طبعا”
و خلص المعرض و انا سعيدة جدا بالنتايج..
و طول الطريق فضل المدرب ياكل دماغي، و بدأ يتكلم شوية عن ابني و قد ايه انه حبه من اول نظره..
كنت حاسة ان المدرب ده مش هيجيبها لبر خصوصا انه عمال يطول معايا الحصص و انا مش بتحسن ابدا لانه بيفضل يخوفني طول ما انا سايقة.. و بعد المعرض بيوم بالظبط كان عندي حصة، و نزلت ماما علشان تشوفه وقالت لي:
“الراجل ده نظراته مش كويسة، و بيبص عليكي بطريقة ما عجبتنيش.. اديله استمارة 6”
و في نفس اليوم كانت اخر حصة، و بعد ما طلعت شوية بالعربية لقيته عمال يسبلي، و يقول لي:
“انا مغرم بكي، و كان حلم من احلام حياتي اني اقابل بنت مصرية”
وقتها رديت و قولت له:” انا هسوق بك على البيت علشان انزلك عند عربيتك، و بعدها تاخد حسابك و مع السلامة كفاية لحد كده”

وفضل ساكت طول الطريق، و انا حاولت اسوق على قد ما اقدر، و كنت متوترة جدا لحد ما وصلت..
و مشي المدرب و معاه استمارة 6، و حكيت لماما على اللي حصل، و فرحت انه مشي …و كسرنا وراه قله..
بس افتكرت ان بعد بكره لازم اروح على (تروا ريفيير) .. يا ترى رحت إزاي؟

10