كان التاريخ 16 مارس 2018 و حددنا فيه إننا نعمل بيبي شاور للبيبي، و ده تقليد كندي معروف جدا و بتكون فرصة إن أي حاجة ناقصة البيبي تجيله عن طريق الأقارب، والمعارف،والأصدقاء..
كنت استعديت له و جبت تيشرت عليه صورة بيبي من (أمازون)، و اشتريت كمان من على نفس الموقع شوية زينة كلها لونها (أزرق فاتح) احتفالا بالولد.. في الوقت ده ساعدتنا ماما، و أشارت علينا بتحويل ركن في الأوضة و نخليها أوضة الطفل.. و فعلا طلعت حلوة جدا، و كانت فكرة عبقرية من ماما.. و بدأ روميو بتركيب سرير البيبي و كان شكله جميل.. و بدأت أتخيل البيبي وهو نايم فيه. كان باين إن المكان ناقصة دولاب يمشي مع السرير، بس قولت مش مشكلة هنلاقي له حل..
و عرفت من زميلتي الفرنسية الكندية اللي كانت حامل معايا و كانت مكملة في الشغل إن عادة الناس بتعمل حساب على (امازون) و بيسموه (بيبي ريجستري) و يكتبوا فيه كل اللي ناقصهم و يشاركوه مع الأصدقاء اللي هيحضروا (البيبي شاور)..
و فعلا عملت السجل ده،وبدأت أبعته للناس اللي كانت قايلالي إنها هتحضر و كانوا مقربين مني جدا وهم:
صديقتي الفنزويلية و جوزها
جارتي اللي في البيت اللي جنبي
جارتي المدرسة اللي في البيت الخامس
زميلتي الفرنسية الكندية
أما من ناحية روميو، مكانش فيه حد خالص. كانت أكتر حاجة بستغربها إنه كان بقاله 6 سنين عايش في كندا و مكانش عنده لا معارف و لا أصحاب..
و جت صديقتي الفنزويلية هي و جوزها و جابوا هدايا لطيفة بس مش من (البيبي ريجستري).. و طبعا كتر خيرهم جدا خصوصا انهم جابوا هدايا كتير و على ذوقهم اللي كان فعلا حلو..
واعتذروا الباقيين، بس قالولي انهم هييجوا في مواعيد تانية و كلهم أصلا جايبين هدايا للبيبي و مجهزينها..
كان يوم جميل و اتبسطت ماما بالتجمع ده، و اتبسطت اكتر إنها نظمت لنا الأوضة بتاعتنا اللي بصراحة كانت محتاجة عفش جديد لأن عفشنا كان كله مكسر..حاولت أدور على طريقة إني أجيب حاجات مخفضة أو مدعمة.. و فعلا هوصل في الأخر لحل مؤقت..
كانت لسه كمان حاجات ناقصة البيبي و أهمها (كار سيت) و عربية الأطفال (سترولر) و دول محتاجين مبلغ و قدره..
رحت كلمت روميو و قلت له:
“إحنا محتاجين جدا الحاجات دي هل هتقدر تساعدني؟”
قال لي:” أنا معرفش الحاجات دي بكام ؟ بس هديكي 100 دولار و حاولي تدبري أمورك بها، بس حاولي تجيبي حاجات جديدة مش مستعملة”
طبعا روميو مكانش سمع أبدا عن المثل اللي بيقول:”إذا أردت أن تطاع فأمر بما هو مستطاع” يعني أزاي ب 100 دولار أجيب حاجتين الحاجة منهم لو جديدة هتعدي ال 250 دولار.. لكن رديت و قلت له:” حاضر”
و بدأت ادخل على موقع (كي جي جي) و فعلا لقيت (كار سيت) جميل و لسه قدامه سنتين في صلاحيته.. و دي كانت أول مرة اسمع عن إن (الكار سيت) ليه صلاحية و كمان على حسب الوزن والعمر بتاع الطفل يفضل يتغير..

لكن فهمت إن أول كرسي بيفضل من أول الولادة لحد سنتين بالكتير.. بعدين من سنتين ل 4 كرسي تاني، و من 4 كرسي تالت وآخر مرحلة هي (البوستر)..
طبعا الكراسي دي مهمة حتى لو حد معندهوش عربية، لأن لو مثلا عايزة أخد تاكسي أو أوبر أو عربية أي حد لازم البيبي يركب العربية بال (كار سيت) من غير كده غرامة كبيرة لصاحب العربية..
و جيبت ال (كار سيت) الحلو ب 50 دولار و تمنة الأصلي كان 200 و كان بحالته تقريبا..
و بكده فاضلي 50 دولار .. و بدأت أدور على ال (سترولر) و بصراحة كانوا غاليين جدا حتى المستعمل منهم و أقل حاجة في حدود 200 دولار.. لحد ما لقيت إعلان من واحدة على صفحة الفيس بوك الخاصة بالحي وكانت عارضة لعبة للأطفال و استرولر و الاتنين ب 25 دولار.. بصراحة ما صدقتش و رحت علشان اشوف الحاجة.. و فعلا كانت حاجات جميلة و نضيفة جدا، و دفعت ال 25 دولار و كمان جبت لعبة مناسبة للبيبي و أتبقى معايا 25 دولار من ال 100 دولار المبروكة بتاعة عم روميو شلتهم على جنب..
و بعدين طلعت على محل ملابس مستعملة متخصص في ملابس الأطفال فقط و كان جنب البيت، و جبت للبيبي (بدلة تلج)تجنن وحسيت انه هيحتاجها جدا وهو خارج من المستشفى خصوصا انه المفروض قرب يتولد و الجو كان بارد جدا، و كان الثلج لسه بينزل..و فعلا البدلة دي جت في محلها جدا و هي اللي لبسها البيبي و هو طالع من المستشفى..
و حكيت لروميو على المشتريات و إني جبت كل حاجة و زيادة بالفلوس.. و بصراحة كانت أول مرة يقول لي فيها (برافو) و عجبه جدا إني كنت مدبرة و فوقت توقعاته بكتير..
وبعد يومين بالظبط و زي ما يكون البيبي و ماما وشهم حلو جدا على روميو بعتلنا المحامي و قال لنا:
“خلاص كده الإجراءات كلها خلصت و فاضل بس خطوة واحدة، و هي إن روميو يروح يعمل الفحص الطبي.. و دي أخر خطوة قبل ما تطلع له الإقامة”

كان روميو طاير من الفرحة و قعد يقول لي:” انتِ لكي فضل كبير علي، و وصولي للنقطة دي وصولي لحلمي اللي كنت مستنيه من فترة ومكنتش عارف أحققه لوحدي أبدا”
كنت وقتها فرحانة أكتر منه و حقيقي من كل قلبي لأسباب كتير من أهمها إني كنت لسه عندي أمل أنه هيتغير.. والحاجة التانية انه يشتغل في النور و يمسك حاجة كويسة بدل الشغلانات اللي من تحت الترابيزة (الكاش) اللي مش قادر يشتغل غيرها.. كنت حاسة إن حياتنا هتتحسن و هناخد مكان لوحدنا بدل عيشة المشاركة اللي مكنتش أتمنى أبدا إن ابني يعيشها..
و احتفالا بالمناسبة السعيدة قررت إني اعزم ماما و روميو على العشاء، و خصوصا إني كنت محوشة شوية فلوس من قبل ما ماما تيجي كلها خاصة ببند الفسح و الترفيه علشان خاطر عيون ماما طبعا، و بقدر الإمكان أقدر اسعدها حتى لو أنا ظروفي المادية مش قوية، بس طبعا لازم كنت ابسطها و ادلعها..
و خدتهم على مطعم هندي جنب بيتنا كان شيك و جميل جدا و عجب روميو، لكن ما عجبش ماما.. و وعدتها إني اعوضها لها في فسحة تانية..
كانت ماما نفسها تشوف بيتنا شكله أحلى و يتفرش زي ما كانت بتحلم.. و من كتر كلام ماما على البيت و اللي ناقصه، بدأت اعمل بحث مكثف علشان أشوف لو فيه طريقة أجيب بها حاجات مرة واحدة و تكون مش مكلفة زي لو رحت اشتريتها جديدة من المحلات..
و بعد بحث استمر لأقل من يوم وصلت لمكان مناسب و يعتبر حل مؤقت للناس اللي ظروفها المادية على قدهم زي حالاتي انا و روميو.. يا ترى إيه هو المكان ده؟ و هجيب منه إيه؟

8