كنت بسمع روميو بإهتمام جدا ومترقبة الأسم اللي اختاره.. و لقيته أتنهد تنهيدة طويلة و بعدين قالي:
“ماريو” ده إسم البيبي..
قولتله:”حلو بس ليه ماريو تحديدا؟”
قالي:”أسم جدي أبو أمي اللي مات وهو اللي رباني، ونفسي أخلد ذكراه”
ما اعترضتش أبدا وابتسمت وقولتله:”خلاص أتفقنا، بس البيبي لو طلع بنت أنا اللي هختار أسمها”
قالي:”أتفقنا”
و بالرغم إنه كان عندنا مشكلة الإيجار وإن روميو ما قبضش تقريبا الشهر بحاله إلا إني قولتله:
“أنا سألتلك المشرف بتاعي و معايا رقم لو كلمته هيشغلك من بكرة، والرجل ثقة”
كمان قولتله:” أنا هشيل الإيجار كله الشهر ده، بس اعمل حسابك ما تاخدش على كده ولازم تشتغل زي ما أنا بشتغل 5 أيام في الأسبوع، وطبعا محتاجين حد ييجي يسكن معانا كالعادة”
قالي:”طبعا معاكي حق. وبالنسبة للفلوس أنا أهلي بعتولي 500 دولار خديهم، و من الشهر الجاي أوعدك إني اعمل ما في استطاعتي إني ادخل فلوس اكتر.. ده أنا هبقى أبو ماريو”
و فعلا بدأت احس إن فكرة انه هيبقى أب أدته دفعة وطاقة جديدة،كنت شايفاها في عينيه، وحساها في كلامه!
و قبل أي شيء، عملت إعلان في (كي جي جي) بدور فيه على ساكن جديد. و كانت المرة دي متيسرة وسهلة جدا، زي ما تكون على وش (ماريو)..
و جالنا 3 في نفس اليوم، لكن إرتاحنا جدا لشاب كان باين عليه انه محترم.كان من أسبانيا وجاي كندا علشان يقعد يشوف لو هيشتغل فيها بحكم انه كان أتولد وعاش فيها و هو صغير، بعد كده أهله رجعوا على أسبانيا و هو قرر لما يرجع لما خلص دراسته الجامعية، و بعد ما بقى عنده خبرة شغل معقولة في مجال العمل الاجتماعي والخيري، وكان ده هدفه انه يشتغل في نفس مجاله.
و رسينا على الشاب ده، اللي فورا دفع لنا شهر كامل.. وكان باين من طريقة لبسه و كلامه انه مش نصاب، و لا زي النيجيري خالص..
في الوقت ده كنت عليت الإيجار شوية لما عملت الإعلان و محدش إعترض من اللي جم شافوا الأوضة. إتفقت معاه على 750 دولار في الشهر. و بكده باقي الإيجار ال 1200 دولار بقوا بيتقسموا علي أنا و روميو علشان كنت خلاص بخطط إني أجيب عربية، بس كنت طبعا محتاجة ادخل امتحان الرخصة تاني..
و فعلا أتشجعت، وحجزت ميعاد الامتحان بعد ما جاتلي فلوس، و اتصلت بالمدرب المتحرش في نفسه و قولتله:
“معانا من 1-5 أغسطس تركز معايا، 5 حصص و ملكش دعوى بالهاي واي لأني مقدمة على G2”
قالي:”ماشي.. اتفقنا!”
و بدأ جو البيت يتغير، و تدب فيه روح جديدة كلها أمل و تفاؤل و حلم كبير اثنين بيحلموه مع بعض: أنا و روميو.
و احتفالا بالأجواء السعيدة دي. قررت أنا و روميو نستكشف شاطىء تاني غير اللي رحته قبل كده لوحدي.. و طبعا الشواطيء في تورنتو كلها مياه عذبة لأنها على بحيرة (أونتاريو‏) و بالتالي فيها عيبين:

الأول: رملتها بتبقى حصى و في بعض الأحيان صخور
الثانية: المياه بتكون باردة جدا حتى في عز الصيف و من الصعب إن الناس تنزلها لشدة برودتها
لكن كان فيه مكان ممتاز، وكان يبعد شوية عن بيتنا و اسمه(صاني سايد) كان ميزته إن فيه شاطيء كبير و رملته ناعمة إلى حد ما، و كمان كان ملحق به حمام سباحة مجاني تبع خدمات المدينة و يعتبر من أجمل حمامات السباحة حقيقي و كأنه تايع لفندق مثلا..
و رحنا و أتبسطنا، و روميو كان فرحان جدا و كان بيقولي:” انت عارفة يا روزة، انت خلتيني أشوف تورنتو من أول و جديد، مع إني بقالي سنين عايش فيها لكن مكنتش بروح حتة، بس معاكي شوفت كتير وعرفت أكتر”
و دي حاجة في دايما، وهي إني بحب اكتشف المكان اللي عايشة فيه، و دايما أدورعلى أماكن جديدة تجددلي طاقتي، و كمان تزود معرفتي بالمكان، والأهم من كل ده ما تكونش فسح مكلفة لأن كل مكان أكيد فيه فسح اقتصادية، و أنا من أنصار إن الفلوس يتعمل بها حاجات مفيدة اكتر زي مثلا في الوقت ده كانت أولوية بالنسبة لي الرخصة و من بعدها العربية .. يبقى الفلوس تتحط في الحاجتين دول الأول.
و لان كان جوايا طاقة إيجابية كبيرة، فكنت بجذب كل الأشياء الإيجابية لي و ده سر أنا هقولكم عليه..
أنا اكتشفت بعد ما غيرت طريقة تفكيري عن أيام دبي، وإن ببساطة أعمل اللي علي و ما اتعلقش أوي بالنتايج، و اتفاؤل وأسيبها على ربنا بعد ما أكون فعلا متأكدة إني ما قصرتش في العمل أو السعي، إن الحاجة بتجيلي، و لو ما جاتليش، ببقى متأكدة إن ربنا شايلي حاجة أحسن أو الشيء ده مكانش فيه خير ليه. وبالتالي هديت و مبقتش بزعل على أي فرصة لو ما جاتش زي أيام دبي.
لقيت إيميل من جونسون اند جونسون إن عندي مقابلة أخيرة معاهم، و فعلا رحت و قالولي:
“انتظري مننا تليفون النهاردة أو بكرة”
و فعلا كلموني و طلبوا من ريفرنس و أديتهم رقم المشرف بتاعي في الشغل، وحقيقي كان واقف جنبي جدا خصوصا لما عرفته انهم كلموني، وخلاص هيبعتولي العقد بعد المكالمة دي..
لكن قبل ما يبعتولي العقد لقيت نفسي بكتبلهم إيميل من نفسي و قولتلهم:
“أنا شاكرة جدا للفرصة دي، بس أنا حبيت أعرفكم إني حامل وعارفة إني كمان 8 شهور هاخد أجازة الأمومة فحبيت أعرفكم”
طبعا ردوا علي خصوصا انهم ماكانوش بعتوا العقد و قالولي:” إحنا بنشكرك على تعبك، بس إحنا اختارنا حد تاني”
كنت متأكدة انهم ردوا رد دبلوماسي علي علشان ما يبقاش عليهم أي مسؤولية، لكن هم حقيقي تراجعوا عن انهم يبعتوا العقد لما قولتلهم إني حامل.. و بغض النظر عن اللي عملته ده كان غلط، و لا صح، أنا مش ندمانة”
خدتها بصدر رحب، و طمنت نفسي إني كمان 8 شهور هقعد في البيت وهترحم من المكتب الغلس ده، وخلاص اكمل ال 8 شهور دول و خلاص..
و ما اترددش إني أقول للمشرف في نفس اليوم إني حامل، و فرحلي جدا بس قالي:” يعني انتي ناوية تسيبينا بأي شكل!”
ابتسمت و قولتله:” اه”
و علشان افصل من الخبر ده و ضياع الفرصة، رحت و دخلت فيلم إيطالي لوحدي كان من أفلام المهرجان و كنت قولت لروميو اللي بدأ يفهم إن حب السينما منافس له هو أساسا و قالي:” روحي يا روزة و أتبسطي وأنا هعملك عشاء ملوكي لما ترجعي البيت هتلاقيه”
و فعلا رجعت لقيت روميو جايبلي ورد أحمر من بتاع زمان و عشاء عامله (طبعا مكرونة) و قالي:
“أنا كلمت الرجل اللي أديتني رقمه، و من بكره هنزل معاه شغل”

و حكيتله على فرصة جونسون اند جونسون و ردي عليهم و ضياعها و قالي:
“مش عارف أقولك إيه لان ابسط شيء هقولهولك، ما كنتيش قولتلهم انك حامل.. بس عموما مش مشكلة المهم انك مرتاحة نفسيا”
أتبسطت انه ما لمنيش و كان متفهم جدا لقراري ..
و خلص شهر يوليو و هيبدء شهر أغسطس اللي هتكون فيه أحداث كتير: من شغل روميو الجديد، وامتحان الرخصة، و كمان فرصة شغل جديدة بعتلي إني أروح أعمل الامتحان.. يا ترى إيه هي الفرصة الجديدة دي؟

8