كان التاريخ 13 مايو 2018 وكان التاريخ اللي بتتفتح فيه زهور شجر الكريز اللي منتشرة في اجمل و أكبر حديقة في تورنتو و هي (هاي بارك).. دايما في التاريخ ده بتتفتح زهور شجر الكريز اللي له حكاية جميلة، و بتخلي الحديقة دي مكان تزوره الناس من كل حتة في أونتاريو و احيانا من بلاد تانية كمان..
أما حكاية شجر الكريز تبدأ بأن الشجر ده مش موطنه الأصلي كندا لكن موطنه الأصلي اليابان.. و كشكر و تقدير من الحكومة اليابانية للحكومة الكندية و كنوع من تذكر الجنود اللي ماتت من اليابان و كندا في فترة الحرب العالمية الأولى بعتت اليابان براعم أهم شجرة عندها و هي شجرة (الكرز أو الكريز) اللي ما بتطرحش غير الورود فقط و مش الشجرة اللي بتطرح ثمارالكريز.. وصلت براعم الأشجار في بدايات سنة 1930 في فانكوفر و أونتاريو.. و انتشرت في كم مكان في أونتاريو‏، لكن أشهر مكان منهم هو حديقة (هاي بارك) في قلب تورنتو.
و لمعرفتي للقصة دي و لحبي للورد و شغفي بكل ما هو ياباني قررت إني اخد ماما علشان تروح معايا، و دي كانت تاني مرة لي إني استمتع بجمال تفتح شجر الساكورا (الكرز) الياباني..
و رحت قلت لروميو:” أنا عارفة إن النهاردة الويك إند و أنا نفسي أودي ماما الحديقة اللي بيتفتح شجر الكريز، و عارفة انك مش بتستمتع بالأجواء دي.. ممكن اطلب منك طلب؟”
قال لي:” آه .. أتفضلي”
قلت له:” عايزة اروح مع ماما واسيبلك البيبي وانا عارفة انك بتعرف تاخد بالك منه و هتعرف تغير له و ترضعه و كل حاجة”
قال لي:” أكيد.. دي بالنسبة لي أحلى أجازة إني أكون مع ابني و اقعد في البيت”
قلت له:” يعني متفقين”
قال لي:” متفقين يا روزة.. و أنا عارف انك بتحبي الورد و عايزك تنبسطي لأني مش حاسك زي الأول خالص”
شكرته و من جوايا كنت عايزه أقول له:” لا أنا مش مبسوطة و مبقتش عارفة أنا عايزة إيه، و أحلامي تاهت معاك كلها”
و لبست فستان ازرق منقط بأبيض و سرحت شعري تسريحة حلوة، و جهزت إني أنا و ماما نروح (هاي بارك)..
كانت أول مرة لماما إنها تركب المترو و عجبها بس طبعا هي ما شافتش المترو ده ايام ما كنت باخده الصبح وقت الشغل كان عامل إزاي!
و دخلنا الحديقة اللي كانت زحمة جدا اليوم ده بسبب تفتح شجر الكريز و كان جايلها ناس من كل حتة في الدنيا..
و للأسف فضلنا نمشي كتير جدا و حسيت بمعاناة ماما الشديدة و خصوصا إن ركبها تعبانة، و لما وصلنا لمكان الشجر عجبها جدا بس كان باين عليها التعب..
و هنا جاتلي فكرة حلوة و قلت لها:” خلاص مش هتمشي تاني.. إحنا هناخد القطر اللي مشهورة به الحديقة و بعدين يطلعنا على أول الشارع و أول ما نطلع هطلب أوبر إيه رأيك؟”
قالت لي:” حلو كده .. برافو”
و لما اطمنت انها مش هتمشي تاني، بدأت تستمتع بالمكان اللي هي فيه و قعدت اشرح لها عن الشجر و حكايته و أخدنا صور كتير..
بصتلي وقالت لي:” أنا عارفة انك رقيقة جدا و حساسة تمام زي الورد الجميل ده اللي على شجر الكريز، لكن عيشتك مع الرجل ده هتخليكي تدبلي”
وصفتني ماما بأكتر لغة بحبها و بفهمها و هي لغة الورود، و قبل ما عيني تدمع بصيت على الشجر و تخيلت نفسي و أنا بسقط من عليه في وقت قريب جدا تماما زي مع بيحصل مع ورود شجر (الساكورا)..
رجعت بصيت لماما و قلت لها:” انتِ شايفة كده؟”
قالت لي:” آه يا بنتي شايفة كده”
وتاه كل كلامي و انعقد لساني مع إني كان نفسي احكي و أتكلم مع ماما، بس ما قدرتش لأني افتكرت صورة البيبي اللي بقى في حياتنا أنا و روميو و سكت،و شردت، وبطلت أقول أي حاجة..
و ركبت القطر أنا و ماما و كانت تجربة حلوة إنها تشوف و تستكشف الحديقة الكبيرة جدا من غير ما تتعب، و انبسطت على الأخر منها و من جمال الطبيعة اللي فيها..
و طلبنا أوبر و قررت إننا ننزل في كافية قبل ما نرجع البيت و خدنا أحلى (شاي) مع (سكونز) وده نوع من المعجنات أصله انجليزي و كان فيه محل في منطقتي متخصص فيها و مشهور بها جدا..
كنت قاعدة و بحاول أملي عيني من صورة ماما اللي فاضلها بالظبط أسبوعين و تمشي.. كنت مبسوطة إنها لسه معايا، لكن كمان كنت زعلانة إنها قربت تمشي..
و رجعنا البيت بعد ما قضينا يوم جميل و لقينا روميو شايل البيبي و مبسوطين جدا و منسجمين مع بعض بعد ما قضى احلى وقت مع البيبي و هو قاعد في البيت..
و قعد يقول لي:” بصي يا روزة أنا نضفت لك البيت و غسلت و كل حاجة”
شكرته وقلت له:” آه تشكر مفيش داعي”
ضحك و قال لي:” يا روزة مفيش داعي إيه.. انتِ نسيتي أنا اللي دايما بغسل و بنضف في الويك إند و انتِ بتخرجي و تتفسحي”
و كانت فعلا دي حياتنا و ما أنكرش في الأول إنها كانت عاجباني، بس بعد كده حسيت إن الأدوار مقلوبة و حتى لو كان حابب يساعدني كان لازم يكون في مبدأ المشاركة، لكن في قصتنا تبدلت الأدوار تماما.. كنت حاسة مع روميو إني رجل و ست طول الوقت.. كنت الرجل اللي بيجري على أكل عيشه و يخطط و يحل المشاكل و يتصدى لصاحب البيت او اي مشكلة كبيرة.. كنت الرجل اللي بيعمل كل الأوراق و الإجراءات.. كنت الرجل اللي كل حاجة بأسمه.. و كنت الست اللي بتحمل و تولد..
و سألت نفسي:” انتِ مبسوطة كده؟”
إجابتي كانت قاطعة و رد قلبي و عقلي و قالوا لي:” لا إحنا مش مبسوطين”

كنت مش متخيلة إني هكمل كل حياتي بالشكل ده و إني لو عملت كده هدبل و هقع من على الشجرة تمام زي ما وصفتني ماما و إحنا في حديقة (هاي بارك)..
و بدأت احس إني مبسوطة بس و أنا بعيد عن روميو.. اللحظة اللي بشوفه فيها بحس بحزن و ببقى زعلانة من حاجات كتير، و على حاجات كتير أهمها نفسي..
و بسبب قلة كلامي و هدوئي المكتسب بقيت مشوشة و انعدمت رؤيتي لكل حاجة، لكن كنت شايفة دايما صورة البيبي بينا..
لحد ما هتجيلي دعوة لحفلة إيطالية و كان ممكن اروح مع روميو كمان و كان اللي دعاني لها المكتب التجاري الإيطالي اللي كان نفسي ارجع اشتغل معاهم..
هل رحت الحفلة مع روميو؟ و هكون مبسوطة و لا لأ؟

9