و اعتذرت البنت صاحبة الاكسسوارات عن البازار، و طبعا مدربة السباحة مكانتش بتفكر فيه من الأساس، و كمان الشاب الروسي كان عارف انه بره الموضوع ده و بالتالي رست علي انا والمدرس التركي..
و سألني:”تحبي تشتركي معايا في الترابيزة و لا تحبي يكون عندك ترابيزة خاصة بكِ؟”
كان عندي تصور اني محتاجة ترابيزة لوحدي، و بصراحة كان تصور خاطئ تماما..
و حاولت ادور على مكان اجر منه الترابيزة بس طبعا الاماكن غالبا ما بتأجر ترابيزات كبيرة و انا مكنتش محتاجة الحجم الكبير ده، و نسيت تماما ان نقلها هيكون صعب جدا..
و رحت و اجرت و معرفتش انقلها حتى بعد ما عرضت جارتي التركية انها تساعدني، لكن بالصدفة قابلت رجل عند المحل كانت عربيته كبيرة وقال لي:”أنا هوديهالك على المكان اللي انتِ عايزاه..و لولا الرجل ده مكنتش عرفت انقل الترابيزة”
و وصلت انا و البيبي و شنطة سفر مليانة ملايات العامرية، و الترابيزة جت مع الرجل و فرشت و قلت :”يا مسهل”
طبعا البيبي كان يا دوب عمره 8 شهور و كان بدأ يزحف و كان كل شوية يزحلق نفسه من الكرسي علشان ينزل يزحف على الأرض ،وكنت شايفاه عامل زي الحلزون .. و كل شوية امسكه من ركنة..
كنت مشتتة جدا بين البيبي اللي بيزحف، و بين اني اركز على البيع، لكن الفكرة كلها ان الملايات مكانتش المنتج المناسب للبيع في البازار..
و لقيت المدرس التركي جايب خداديات معمولة مخصوص للكريسماس و يمكن دي كانت اكتر حاجة باعت..
كمان كان فيه واحدة معاها اكسسوارات و واحدة تانية معاها طواقي و جوانتيات هم دول اكتر ناس عرفوا يبيعوا، لكن أنا للأسف في فترة استمرت 6 ساعات مبعتش اي حاجة .. لا و لسه لازم الاقي طريقة ارجع بها البيت بعربية كبيرة علشان الترابيزة الضخمة اللي جبتها..
و طلبت تاكسي كبير و خد يمكن 30 دولار في مسافة صغيرة جدا، وكانت تجربة غير موفقة بالمرة..
و بالرغم من كل شيء و من فشل التجربة إلا اني اتعلمت حاجتين..
الأولى: ان اكتر حد هون علي اليوم كان ابني و وقتها كتبت له رسالة وقلت له:”انت مصدر إلهامي و قوتي رغما عن كل شيء ”
الثانية: بدأت أدرك أن شغفي و فكرة مشروعي لازم اغيرها و لازم افكر بشكل عملي اكتر ..
و وصلنا ليوم 15 ديسمبر يعني لازم اخد أهم قرار في حياتي و هو :إما اني استقيل و ما ارجعش شغل التأمين اللي فاضلي على انتهاء اجازتي اسبوعين ..أو اني ارجع الشغل اللي حقيقي كان مستنيني..
طبعا ظروفي كانت صعبة جدا و دخلي كان قليل، و السكن غامض، و مش عارفة ايه اللي هيحصل فيه.. لكن برغم كل شيء قررت إني ابعت استقالتي للشركة و اقول لهم:
“اشكركم جدا على متابعتكم معايا وعلى انكم لسه محتفظين بمكاني، لكن انا قررت إني استقيل و شكرا”
و استقالت و انا مقررة أنه طريق مش هرجع ابص عليه تاني الا لو حاجة فعلا على مزاجي و متاخدش وقتي كلي.. و أولويتي الأولى و الأخيرة هي اني اعمل البيزنس الخاص بي..
كنت مدركة تماما أن فلوس التأمينات هتتقطع كمان اسبوعين و الدفعة اللي جاية هي آخر دفعة.. و ده معناه ان الدخل الثابت في حالتي هي فلوس الطفل و اللي كانت (500 دولار) و شوية الفلوس اللي كنت حوشتها للعربية، و اللي ما كانتش تتعدى ال (2000 دولار)..
و طبعا كان لازم اعرف انا هعمل ايه و ايه الشغل اللي هيدخل فلوس على طول، أو بمعنى اصح مصدر للدخل اقدر اعيش منه..
و هنا جه دور المركز اللي كنت باخد فيه التدريب.. و كانت مصدر المعلومات بالنسبة لي هي المدرسة اللي مكنتش بستريحها من أول ما شفتها، لكن كان لازم اسألها علشان استعد برضه في اللي جاي.. و بعد ما سمعت وجهة نظري للآخر قالت لي:
“بصي انا من وجهة نظري انتِ استعجلتي في أنك قدمتِ استقالتك..”
قلت لها:” لا انا مش هرجع ابقى موظفة تاني الموضوع ده مقفول.. انا جاي اسألك علشان تفكري معايا في حلول بره الصندوق.. مش تحطيني تاني في صندوق الوظيفة”
و لما لقتني مصممة و دماغي متربسة على الأخر من موضوع الوظيفة قالت لي:”خلاص مقدمكيش غير الويل فير(الإعانة الاجتماعية)..”
طبعا الويل فير دي انا كنت سامعة عليها من أول ما جيت و عارفة ان ناس كتير بتكون عايشة عليها.. كنت بحس ان الكلمة دي تقيلة و بتحط ناس في خانة معينة و هي خانة الناس اللي مش عايزة تشتغل، و بالتالي بتفضل تكون على إعانة البطالة، و مكنتش حاسة ان ده حل مناسب لي..
لكن قبل ما اقول اه او لا دخلت و عملت بحث حتى على الويل فير أو المعروفة بأسم (أو-دبليو)..
و لقيت حاجة المدرسة مكنتش عارفاها و هي ان فيه قسم في ال (او-دبليو) عبارة عن برنامج بيكون لمدة سنة و نص فقط مخصص للي عايز يبدأ بيزنس صغير و بتكون فلوسه أقل، لكن فيه فرص تدريب و مساعدة من ناحية البيزنس مع التزام المستفيد انه كل شهر يقدم سجلات مصروفاته و مبيعاته و على أساسه بيخصموا المصاريف من المبيعات، و لو مكملش حد معين من الفلوس بيدفعوا له اللي يكمل.. يعني مساعدة جزئية و معتمدة على النشاط مش زي ال (او-دبليو) العادي..
و عجبتني الفكرة دي و البرنامج ده لكذا سبب منهم:
1- أنه محدد المدة سنه و نص مش زي ال (او-دبليو) العادي
2- متابعة مستمرة لصاحب البيزنس
3- القسم اللي بيتعامل معاه بيكون كويس و افضل من الأقسام العادية اللي كتير من العاملين فيها (سوشيال وركر) بيكونوا بيتعاملوا بتعالي شديد مع الناس و كأنهم بيدفعوا لهم الفلوس دي من جيبهم..
4- فرص تدريب مستمرة و اشراف على نجاح البيزنس
و حاولت اقدم على البرنامج ده من الأول بس ما عرفتش و اتصلت بالمركز العام و اتقابلت مع موظفة قالت لي:
في الأول هتتسجلي عادي لحد ما تسجلي البيزنس و بعدها تتحولي على برنامج (العمل الخاص)..
و هنا بدأت اعمل بحث تاني و لقيت ان عندهم برنامج تدريب بيأهل اللي بيستلموا الفلوس دي انهم يعملوا (خطة مشروع )كاملة و كمان و يسجلوا البيزنس و بيدوهم منحة يبدؤا بها المشروع و متابعة مع (Mentor) بيكون متطوع و له خبرة كبيرة في البيزنس، و بيكون مشرف على المشروع، و كل ده لضمان استمرارية المشروع ونجاحه..
و رجعت للموظفة و اللي كانت كشرية جدا و قلت لها:
“طيب انا هدخل عادي و انا فلوسي هتتقطع من التأمينات في أول يناير… و عايزة اقدم على البرنامج ده اللي زي ما انتِ شايفة في نهاية فبراير”
استغربتني جدا وقالت لي:” و مستعجلة على ايه؟! الناس بتدخل على ال OW و بتقعد سنين عادي يعني”
قلت لها:” لا انا مش عايزة ادخل على ال OW العادي، و مش هقعد اكتر من فترة البرنامج الخاص بال self employed “

هزت راسها و قالت لي:” طيب.. بعد ما تستملي أول دفعة لكِ من الفلوس في نص يناير هعملك جواب علشان تدخلي البرنامج ده”
و لأن عندي قدرة على اني اقرأ الناس بسرعة فكنت حساها من النوع اللي بيحتقر الناس اللي بتاخد الفلوس دي .. و طبعا مش هتسلم مني..
و رجعت للمدرسة و حكيتلها على اللي حصل و على انها معندهاش معلومات خاصة بالجزء ده.. حسيتها متضايقه جدا لانها كانت بتحاول دايما تبين انها عارفة كل حاجة و اي حاجة و انا بينت لها أن معندهاش معلومة كاملة..
كمان سألتها:” انتي بقالك معانا اسبوعين و مكملة بطريقة انك بس بتتكلمي عن مشروعك اللي عملتيه في كندا و مانجحش، لكن ما اتعلمناش اي حاجة.. كمان فين خطة المشروع (بيزنس بلان) اللي المفروض نعملها علشان التخرج؟”
كلامي ماعجبهاش و قالت لي:” انا اللي اقول ادرس ازاي مش انتِ.. انا المدرسة مش انتِ”
قلت لها:” وانا من حقي اقول اني ما بستفيدش منك”
و طبعا ده قوم عليها بقية الناس و حست نفسها في موقف ضعف..
كانت مشكلتها الكبرى انها بتحكي لنا عن حياتها فقط.. بدون انها تسمع لأفكارنا و لا توجهنا، و بالتالي كانت بتضيع لنا وقتنا..
وكانت أكبر خسارة أن بعد حوالي شهرين من البرنامج ما نجحتش لا هي ولا التركي انهم يساعدونا نكتب (بيزنس بلان – خطة مشروع)..
و هنا قالت:” انا محدش يقول لي اعمل ايه و ما اعملش ايه..”
و بدل ما ندخل معاها في حوار ملوش لازمة .. قلت لها:” خلاص و انا هبعت ايميل للإدارة بالكلام ده”
وفعلا بعت إيميل للإدارة بالكلام ده، و بناء عليه عرفت ان المدرسة هتمشي بعد ما يعملولنا حفلة تخرج على الضيق كده هتكون في نهاية ديسمبر..
و بكده البرنامج انتهى نهاية غير متوقعة، و كان فاضل آخر يوم لنا في المركز علشان يدونا حاجات قبل ما نمشي، و يعرفونا ايه اللي ممكن نستفيد به بعد تخرجنا من المركز و من البرنامج..
يا ترى مين حضر أخر يوم في المركز معايا؟ و اتكلمنا في إيه؟

9